կարևոր
508 դիտում, 4 շաբաթ առաջ - 2022-05-28 16:12

Հանրապետության տոնի առիթով Հանրապետական մաղթանք և այց Սարդարապատի հուշահամալիր

Հանրապետության տոնի առիթով Հանրապետական մաղթանք և այց Սարդարապատի հուշահամալիր

Մայիսի 28-ին Հանրապետության տոնի առիթով, Ն.Ս.Օ.Տ.Տ. Գարեգին Երկրորդ Ծայրագույն Պատրիարք և Ամենայն Հայոց Կաթողիկոսի օրհնությամբ Սուրբ Գայանե վանքում կատարվել է Հանրապետական մաղթանք: Արարողությունը հանդիսապետել է Մայր Աթոռի Արարողակարգի և արտաքին հարաբերությունների բաժնի տնօրեն Գերաշնորհ Տ. Նաթան արքեպիսկոպոս Հովհաննիսյանը:

Հոգևորականաց դասը և ներկա ժողովուրդն աղոթք են բարձրացրել առ Աստված Հայաստանի Հանրապետության անսասանության, խաղաղ և բարօր կյանքի համար:
Մաղթանքի ավարտին Մայր Աթոռ Սուրբ Էջմիածնի միաբանները այցելել են Սարդարապատի հուշահամալիր, որտեղ Արմավիրի թեմի առաջնորդ Գերաշնորհ Տ. Սիոն արքեպիսկոպոս Ադամյանի, թեմի եկեղեցականների և Արմավիրի համայնքապետ Դավիթ Խուդաթյանի ուղեկցությամբ եկեղեցականները ծաղկեպսակ են դրել հուշակոթողի առջև, ապա աղոթել մայիսյան հերոսամարտերում զոհված քաջորդիների հոգիների հանգստության համար: