կարևոր
1108 դիտում, 1 ամիս առաջ - 2022-08-12 21:29

ՀՅԴ ԳՄ անդամ Սուրեն Մանուկյանին 72 ժամով ձերբակալել են․ ՏԵՍԱՆՅՈՒԹ

ՀՅԴ Գերագույն մարմնի անդամ, ԱԺ նախկին պատգամավոր Սուրեն Մանուկյանի ձերբակալման մասին լուրը Ոստիկանությունից մեկ ոտք շուտ հայտնեց «Ազատ դեմոկրատներ» կուսակցության նախագահ Խաչատուր Քոքոբելյանը: Ըստ նրա՝ Սուրեն Մանուկյանը ու եւս երկու հոգի առեվանգել են իր հորը՝ Գրիշա Քոքոբելյանին: 

Սրան հաջորդում է Ոստիկանության հայտարարությունը, որում ասվում է, թե հուլիսի 27-ից անհետ կորած Գրիշա Քոքոբելյանին վերադարձնելու դիմաց անհայտ անձը կապ է հաստատել նրա հարազատների հետ ու վերադարձնելու դիմաց գումար պահանջել: Եւ իբր Գրիշա Քոքոբելյանին ազատ են արձակել գումար ստանալուց հետո:

Սուրեն Մանուկյանին ձերբակալել են 72 ժամով: Կասկածները շինծու են՝ վստահեցնում է Սուրեն Մանուկյանը:   

Դեռ 3 ամիս առաջ էր, որ Ոստիկանության հատուկ նշանակության վարչությունը խուզարկություն իրականացրեց Սուրեն Մանուկյանի տանը, ընտրակաշառքի ապացույցներ էր փնտրում, բայց չգտավ ու հեռացավ: Մանուկյանը այդ ժամանակ էր նշել, որ իշխանություններն իր հանդեպ քաղաքական հետապնդում են սկսել:

Դաշնակցության մամուլի ծառայությունն էլ հայտարարությամբ հիշեցնում է՝ դեռեւս ամիսներ առաջ են սկիզբ առել Սուրեն Մանուկյանի դեմ քաղաքական հետապնդումները, ֆիզիկական խոշտանգումները, բնակարանի՝ առանց հիմքի խուզարկումը, վարկաբեկման փորձերը:

Ընդամենը 2 ամիս առաջ Քոքոբելյանների կասկածելի գործարքի մասին լուրը ողողեց ողջ համացանցը: Խաչատուր Քոքոբելյանի 20-ամյա եղբորորդին՝ Յուրի Քոքոբելյանը, անցած տարվա խորհրդարանական ընտրություններից երկու ամիս առաջ 50 հազար դրամով, Վանաձորի նախկին քաղաքապետից գնել էր Մարց գետի վրա գործող հիդրոկայանը: Պետական ռեգիստրի տվյալներով` վաճառքի օրն իսկ ընկերության տնօրեն էր դարձել վարչապետի եղբայրը՝ Արմեն Փաշինյանը, որը բնակվել է Ռուսաստանում եւ Հայաստան վերադարձել 2018թ-ի հեղափոխությունից հետո: Այսինքն, չի բացառվում, որ Քոքոբելյանների ու Փաշինյանների միջեւ անձնական մտերմություն կա: Դաշնակցական գործչին քաղաքական դրդապատճառներով թիրախավորելու մասին՝ ՀՅԴ հայտարարության մեջ նաեւ նշվում է, որ նրան ձերբակալել են բնորոշ բեմականացմամբ, բռնության գործադրմամբ՝ անձի առեւանգման կասկածանքով: Փաստաբանը մտադիր է դատարանում բողոքարկել եւ՛ ձերբակալումը, եւ՛, եթե տանեն կալանքի՝ կալանավորումը:

Մանրամասները՝ Անի Նահապետյանի տեսանյութում։