Դա հաջողություն չէ՞, որ թուրքերն այդպես մրմռացին․ «Հրապարակ»

«Հրապարակ»-ը գրում է․

«ԱԺ խորհրդի արտահերթ նիստի օրակարգում այսօր ընդդիմադիր 33 պատգամավորների մանդատազրկման հարցն է։ Զրուցել ենք «Հայաստան» դաշինքի պատգամավոր, ՀՅԴ-ական Արթուր Խաչատրյանի հետ։

- Չնայած 33 պատգամավոր, ըստ ԱԺ քարտուղարության հաշվարկի, հատել է բացակայությունների թույլատրելի շեմը, սակայն ՔՊ-ից ասում են, թե միայն 10-14 հոգու մասով են հավանություն տալու մանդատներից զրկելու գործընթացին։ Ինչպե՞ս եք վերաբերվում առհասարակ այս գործընթացին, եւ ի՞նչ հակաքայլեր ունեք դուք՝ ընդդիմադիրներդ։

- Ես գաղափար չունեմ, թե ՔՊ-ն ինչ որոշում կկայացնի, իրենց տրամաբանությունն ինձ համար ընկալելի չի եղել եւ, հավանաբար, երբեք էլ չի լինի, կարող եմ ասել, որ ֆրակցիան ամբողջական մարմին է։

- Այսինքն՝ եթե որոշեն եւ ընտրողաբար մոտենան խնդրին` առավել ակտիվներին զրկեն, մյուսներին՝ ոչ, ամբողջ ֆրակցիան ինքնակամ վայր կդնի՞ մանդատները։

- Ֆրակցիան մի ամբողջական մարմին է․ բոլորը՝ մեկի, մեկը՝ բոլորի համար։ Բայց ֆրակցիայի անունից պաշտոնական հայտարարություն կդժվարանամ անել, որովհետեւ լիազորված չեմ, բայց էլի եմ կրկնում՝ ֆրակցիան ամբողջական մարմին է։

- Կարո՞ղ ենք ասել, որ կկրկնվի նույն գործընթացը, ինչ տեղի ունեցավ, երբ ՔՊ-ն որոշեց Իշխան Սաղաթելյանին ու Վահե Հակոբյանին պաշտոններից զրկել, մեկ բացառությամբ` մնացած բոլորն ինքնակամ հրաժարվեցին հանձնաժողովի նախագահի ու փոխնախագահների պաշտոններից։

- Կրկնում եմ՝ ֆրակցիան ամբողջական մարմին է, ինչ կլինի, դուք կտեսնեք։ Հիմա Դուք հազար անգամ տարբեր ձեւով նույն հարցը տաք, ես նույն պատասխանն եմ տալու։

- Բայց ի՞նչ կարիք կա գաղտնի պահելու եւ ՔՊ-ականների ոճով պատասխաններ տալու: Հասարակությունն ընդդիմությունից ակնկալիք ունի, որ ինքնակամ հրաժարվեն մանդատներից, մանավանդ, որ հայտարարել եք խորհրդարան չգնալու կամ, ավելի ճիշտ՝ միայն ձեր օրակարգով գնալու մասին։

- Ես չգիտեմ՝ ում մոտ նման ակնկալիքներ կան, շատերի մոտ էլ բոլորովին այլ ակնկալիքներ կան։ Մենք ստանձնել ենք մանդատները, որ իրականացնենք ընտրողների առջեւ մեր տված նախընտրական խոստումները։

- Իշխանափոխություն իրականացնելու խոստման մասի՞ն եք ասում։

- Նաեւ։

- Իսկ մանդատով դա ինչպե՞ս է  հնարավոր։

- Մանդատը գործիք է: Այն վայրկյանին, երբ այդ գործիքը պետք չլիներ, կհրաժարվեինք։

- Դիմադրության շարժման միքանիամսյա պայքարից պարզ դարձավ, որ փողոցով հնարավոր չէ ճնշել իշխանություններին: Կարծում եք` հերթը կարո՞ղ է գալ մանդատին՝ որպես իշխանափոխության գործիքի։

- Իսկ ո՞վ ասաց, որ փողոցում ճնշումը պետք է հուլիսի 3-ին վերջանար, որեւէ ժամկետ նշվե՞լ էր, հանգրվան նշվե՞լ էր։ Չտեսա՞ք՝ մեր ակցիայից ինչքան էին թուրքերը վառվել, ո՞վ ասաց, որ դա փողոցային պայքարի հաջողության չափորոշիչներից չէ։ Դա հաջողություն է, չէ՞, որ  թուրքերն այդպես մրմռացին։

- Բայց հայերը, նկատի ունեմ իշխանությունը, ամենեւին էլ չմրմռացին։

- Համաձայն չեմ, եթե իրենց մոտ բան չփոխվեր, արդեն ստորագրած կլինեին, ու թուրքերն էլ ըտենց չէին մրմռա։

- Դիմադրության շարժումը կրկին ակտիվանալու նպատակ ունի՞, եւ դուք կարծում եք, որ մանդատը որպես իշխանափոխության գործիք կիրառվելո՞ւ է: Ի՞նչ է փոխվել, որ նման համոզմունք ունեք։

- Մանդատը գործիքներից մեկն է, եթե կծառայի վաղը, մյուս օրը, երեկ, այս վայրկյանին, այդ գործիքը երբ պետք չլինի, մենք կհրաժարվենք, փառք աստծո՝ մեր պատգամավորները եւ նրանք, ովքեր նախընտրական ցուցակում են, մանդատն իրենց համար բյուրեղյա երազանք չեն դարձրել։

- Կարո՞ղ ենք արձանագրել, որ դուք այս փուլում ինքնակամ չեք հրաժարվի մանդատներից։

- Մանդատը գործիք է: Որ վայրկյանից մենք տեսնենք, որ դրա կարիքը չկա, այդ գործիքն այլեւս չենք օգտագործի։

- Իսկ կասե՞ք՝ ե՞րբ եք նորից ակտիվանալու։

- Ակտիվանալն ինքնանպատակ չի լինելու, ակտիվության դոզայի մեծացումը կամ փոքրացումը կախված է նրանից, թե դու այդ վայրկյանին ինչ մարտավարական խնդիր ես լուծում»։