Գերիների թեման շահարկվում է քաղաքական հարցերով․ ՏԵՍԱՆՅՈՒԹ

Բաքվի բռնապետը ապրիլի 6-ի եռակողմ հանդիպման ընթացքում Եվրախորհրդի նախագահի ներկայությամբ խոստացել էր գերիների խումբ ազատ արձակել, սակայն տեղի չունեցավ. ինչո՞ւ՝ Փաշինյանն է մեկնաբանում: 
Չվերադարձնելով գերեվարված մեր հայրենակիցներին Ալիեւը փորձում է ռուս խաղաղապահներին վարկաբեկել,- Փաշինյանն է կարծում: Սակայն ինքն էլ ոչ բառացի, բայց կարծես նույն բանն է ակնարկում: 
Փաշինյանը 2021թ. հունիսի 20-ի արտահերթ ընտրություններից առաջ հայտարարում էր, որ գերեվարված մեր եղբայրները մեզ կներեն ու պատրաստ էր որդուն տալ գերիների դիմաց: 
Ամիսներ անց, երբ քարոզարշավը վաղուց ավարտված էր եւ իշխանությունները հասկանում էին, որ նոյեմբերի 9-ի կապիտուլյացիոն փաստաթղթի՝ ադրբեջանցի գերիներին վերադարձնելու կետը կատարել են, բայց Ադրբեջանին հայ ռազմագերիներին վերադարձնել չեն կարողացել պարտադրել, սկսեցին հռետորաբանություն փոխել: 
Վերջին անգամ հայ գերիների վերադարձ փետրվարի 7-ին է տեղի ունեցել, գերիների ծնողներին սկսել են համոզել, թե ՊԱՏՃԱՌԸ ընդդիմության ցույցերն են, կամ տասնամյակներ շարունակ ապրիլքսանչորսյան ջահերով երթի մեկնարկից առաջ այրվող Ադրբեջանի եւ Թուրքիայի դրոշները: Նման մի կարծիք Հոռոմի խաչմերուկում տեղի ունեցած հայտնի միջադեպի ընթացքում հնչեց: 
ՄԻԵԴ-ում գերիների հարցով Հայաստանի ներկայացուցիչ Սիրանուշ Սահակյանը այնուամենայնիվ համոզված է՝ Հայաստանի իշխանությունները միջազգային ատյաններում պատշաճ չեն ներկայացնում գերեվարված զինծառայողների խնդիրները եւ չկա քաղաքական գծի հետեւողականություն: 
Իշխանականները միջազգային ատյաններում շարունակում են այս հարցը բարձրացնել, Փաշինյանն է վստահեցնում, սակայն մինչ այս պահը Բաքուն հայտնում է 38 հայ ռազմագերու մասին պաշտոնական տվյալներ, մինչդեռ Սահակյանի փոխանցմամբ փաստեր կան, որ ըստ ոչ պաշտոնական ցուցակների՝ Բաքվի բանտերում 118 անձ է պահվում, որոնց իրավունքները որեւէ կերպ չեն պաշտպանվում: 

Մանրամասները՝ Անի Նահապետյանի տեսանյութում