կարևոր
454 դիտում, 1 շաբաթ առաջ - 2022-06-21 22:10

Եվրասիական միջկառավարական խորհրդի նիստ․ ՏԵՍԱՆՅՈՒԹ

«Հավաքական Արեւմուտքի ճնշումները ԵԱՏՄ առանձին պետությունների վրա ուժեղանում են եւ դա անդրադառնում է միության բոլոր անդամների վրա». Ուկրաինայում պատերազմի ֆոնին Արեւմուտքի հետ առճակատման մեջ գտնվող Ռուսաստանի վարչապետն է ահազանգում: Միխայիլ Միշուստինը, Եվրասիական միջկառավարական խորհրդի նիստին, Հայաստանին, Բելառուսին, Ղազախստանին եւ Ղրղզստանին միասնության կոչ է անում: Բելառուսը նույնպես արեւմտյան պատժամիջոցների թիրախում է՝ Ուկրաինայի հարցում Մոսկվային բացահայտ աջակցելու համար: 
Միշուստինը հորդորել է նվազեցնել կախվածությունը արտասահմանյան մատակարարումներից, ընդլայնել արտաքին առեւտրային գործարքներում ազգային արժույթների օգտագործման պրակտիկան` ԵԱՏՄ անդամ երկրների եւ այն պետությունների միջեւ, որոնք, Ռուսաստանի վարչապետի խոսքով, ապացուցել են իրենց վստահելի գործընկեր լինելու հանգամանքը: Ժամանակակից տնտեսական մարտահրավերների համատեքստում՝ Նիկոլ Փաշինյանը ԵԱՏՄ-ի կարեւորագույն խնդիրներից մեկն է համարել պարենային անվտանգության ապահովումը: 
Միասնական շուկայի գործունեության նպատակով՝ Հայաստանի վարչապետը կարեւորել է փոխադարձ առեւտրի խոչընդոտների վերացումը, բիզնեսի գործունեության պայմանների բարելավումը: 
Փաշինյանի համոզմամբ՝ Եվրասիական տնտեսական միությունն աստիճանաբար ավարտում է կայացման փուլը եւ անցնում ինտեգրացիոն ներուժի բացահայտման փուլ՝ ի շահ ընդհանուր տնտեսական տարածքի ստեղծման եւ կայուն տնտեսական աճի: Եվրասիական միջկառավարական խորհրդի հաջորդ նիստը կանցկացվի օգոստոսի վերջին` Ղրղզստանում: 

Մանրամասները ներկայացնում է Մարինե Մելիքսեթյանը