Արցախի ճակատագիրը վտանգված է․ ՏԵՍԱՆՅՈՒԹ

Հայաստանի իշխանությունները 44-օրյա պատերազմից հետո թեեւ դադարել են ասել, որ Արցախը երբեք չի լինելու Ադրբեջանի կազմում, այնումենայնիվ Արցախի ղեկավարությունը շարունակում է անկաշկանդ հայտարարել: 
Նիկոլ Փաշինյանը դեռ հունիսի 15-ին գլխավոր ամբիոնից հայտարարել էր, որ Լեռնային Ղարաբաղի հարցի կարգավորման հիմքում ընդունելի է Արցախի ցանկացած կարգավիճակ, միայն թե երաշխավորված լինի արցախահայության իրավունքներն ու անվտանգությունը: 
Արցախի արտգործնախարարը սակայն վստահ է՝ արցախահայերի իրավունքները պաշտպանված են միայն Ադրբեջանի կազմից դուրս: 
Դեռ ամիսներ առաջ խորհրդարանի ամբիոնից Փաշինյանը հայտարարել էր՝ միջազգային հանրության պարտադրանքով կարգավիճակի նշաձողի իջեցման մասին, բայց այդպես էլ չէր հստակեցրել՝ Երեւանն, ի վերջո, համաձայն է միջազգային հանրության առաջարկին, թե ոչ: Դավիթ Բաբայանը պնդում է՝ նշաձող այլեւս չկա, միայն կարմիր գծեր են մնացել: 
Հաճախակի մեղադրանք է հնչում, որ ռուսական կողմն Արցախում չի կատարում իր պարտավորությունները. Դավիթ Բաբայանն այս մասին ասաց. «Մենք իրավունք չունենք քարկոծել մի երկրի, որից կախված է մեր անվտանգությունը եւ ապագան»: Եւ այն, որ ռուս խաղաղապահների առաքելությունը եւս 5 տարով կարող է երկարել՝ արտգործնախարարը չբացառեց: 
Արցախի արտգործնախարարը Երեւանում է՝ իր հեղինակած «Արցախի հիմնախնդիրը եւ Արցախի Հանրապետության արտաքին քաղաքականությունը» գրքի շնորհանդեսի առիթով: Գրքի քննարկումը վերածվեց Արցախի ապագայի մասին հարց-պատասխանի: 

Մանրամասները՝ Անի Նահապետյանի տեսանյութում