կարևոր
535 դիտում, 2 շաբաթ առաջ - 2022-06-15 20:16

Պատերազմ Ուկրաինայում․ օր 112․ ՏԵՍԱՆՅՈՒԹ

Ուկրաինան ցավալի կորուստներ է կրում Սեւերոդոնեցկում ու Խարկովի շրջանում. սա խոստովանում է երկրի առաջնորդը: Վլադիմիր Զելենսկին հերթական տեսաուղերձում նորից զենքի պահանջներ է ներկայացնում Արեւմուտքին: 
Կիեւի պահանջները քննարկելու համար ՆԱՏՕ անդամ երկրների պաշտպանության նախարարները հավաքվում են Բրյուսելում: Հյուսիսատլանտյան դաշինքի գլխավոր քարտուղարը նախ հիշեցնում է՝ Ուկրաինային արդեն միլիարդավոր դոլարների զենք ու մարդասիրական օգնություն են տրամադրել, ապա շեշտում, որ պատրաստ են շարունակել աջակցությունը: 
Քաղաքական ուղերձներ Կիեւին ու Մոսկվային՝ Ֆրանսիայի նախագահից: Էմանուել Մակրոնը Ուկրաինայի հարեւան Ռումինիայում հայտարարել է, թե ամեն ինչ կանի պատերազմը դադարեցնելու համար, հույս հայտնել, որ Ուկրաինան կհաղթի, բայց եւ ընդգծել, որ Ուկրաինան, ի վերջո, ստիպված է լինելու բանակցել Ռուսաստանի հետ: Մակրոնը պատմել է՝ Զելենսկիին հիշեցրել է, որ Ռուսաստանը հզոր տերություն է եւ եվրոպական տարածաշրջանի մի մասը: 
Ռազմաճակատից. մարտական թեժ գործողությունները շարունակվում են Ուկրաինայի արեւելքում, մասնավորապես՝ Սեւերոդոնեցկում: Առավոտյան Ռուսաստանը հայտարարել էր, թե այդ քաղաքում մարդասիրական միջանցք է բացում՝ խաղաղ բնակիչներին տարհանելու համար, սակայն կարճ ժամանակ միջանցքը փակվել էր: Ռուսները մեղադրել են ուկրաինական ուժերին՝ հրադադարի ռեժիմը խախտելու համար:

Մանրամասները ներկայացնում է Մարինե Մելիքսեթյանը