Պատերազմ Ուկրաինայում․ օր 111․ ՏԵՍԱՆՅՈՒԹ

Պատերազմի 111-րդ օրը մարտական գործողությունների թատերաբեմ դարձած Սեւերոդոնեցկում բոլոր կամուրջները հողին են հավասարեցված: Սա նշանակում է՝ Դոնբասի ռազմավարական նշանակություն ունեցող այդ քաղաք մարդասիրական օգնություն հասցնելն ու այնտեղից մարդկանց տարհանելը այլեւս հնարավոր չէ: Ամեն դեպքում, Լուգանսկի մարզպետ Սերգեյ Գայդայը պնդում է՝ ուկրաինական բանակն արգելափակված չէ, մարտերը շարունակվում են: Մինչդեռ, Սեւերոդոնեցկի մեծ մասը վերահսկող ռուսական ուժերը հայտարարում են, որ ուկրաինական զորքերը շրջափակված են եւ պետք է կա՛մ զենքը վայր դնեն ու հանձնվեն, կա՛մ մահանան: 
Կիեւը խոստովանում է՝ ուկրաինական բանակը Դոնբասում զենք-զինամթերքի պակաս ունի: Նախագահ Վլադիմիր Զելենսկին պնդում է, որ Դոնբասի համար պայքարը պատմության մեջ կմտնի որպես Եվրոպայում եւ Եվրոպայի համար ամենադաժան մարտերից մեկը ու նորից դիմում Արեւմուտքին. ավելի շատ զենք տվեք: 
Գերմանական հեռուստաալիքի եթերում Զելենսկին քննադատել է Գերմանիայի կանցլերին. Օլաֆ Շոլցից պահանջել է հստակ աջակցել Ուկրաինային եւ չհավասարակշռել Կիեւի ու Մոսկվայի հետ հարաբերությունները: 

Մանրամասները ներկայացնում է Մարինե Մելիքսեթյանը