կարևոր
478 դիտում, 3 շաբաթ առաջ - 2022-06-08 01:05

Արտահանողներն ու ներմուծողները՝ մեծ խնդրի առջև․ ՏԵՍԱՆՅՈՒԹ

Խոսքը Վերին Լարսի անցակետում բեռնատարների կուտակումների մասին է: «Ապավեն» միջազգային բեռնափոխադրող ընկերության գործադիր տնօրենը շեշտում է՝՝ ամսվա վերջին կանգնելու են առավել մեծ խնդրի առջեւ, որովհետեւ սկսվում է բերքի արտահանման շրջանը, մասնավորապես արագ փչացող մրգերի: Հենց այդ բեռների համար էլ նրա խոսքով, իշխանությունները փորձում են լուծումներ գտնել, որոնցից մեկը լաստանավն է. այն այս հունիսի15-ին պետք է կատարի առաջին ուղերթը: 
Թեեւ լաստանավային փոխադրումներն ավելի ծախսատար են, բայց, ըստ Գագիկ Աղաջանյանի, շատ դեպքերում նույնիսկ ձեռընտու է տեղափոխել թանկ, քան ընդհանրապես չտեղափոխել՝ կանգնել եւ փչացնել ապրանքը: Տնտեսագետ Գագիկ Մակարյանը լաստանավային տարբերակին դեմ չէ, եթե այն կլինի Հայաստանի սեփականը, այլ ոչ թե ուրիշ երկրինը: Իսկ որպես այլընտրանք առաջարկում է ավիաբեռնափոխադրումների տարբերակը: 
Բեռնափոխադրող ընկերության գործադիր տնօրենը կարծում է, որ լաստանավն իհարկե ոչ ամբողջովին, բայց ինչ-որ չափով խնդրի լուծման մի օղակ է, բայց հիմնական լուծումը, ըստ նրա, մնում է Հայաստանի բեռնատարների համար առանձին կարգավիճակի ձեռքբերումը սահմանային անցման ժամանակ: 
«Դրամի արժեւորման պարագայում կանխատեսելի գնային փոփոխությունը չենք նկատում հենց տրանսպորտային համակարգի պատճառով»,- վստահեցնում է տնտեսագետը: 
Տարվա սկզբից, Գագիկ Աղաջանյանի խոսքով՝ դրամային համարժեքով 40-50 տոկոսով ավելացել է տրանսպորտային ծառայությունների գումարը: 
«Մենք հիմա, որոշակիորեն, հայտնվել ենք ռուբլու ազդեցության ներքո»,- նշում է Գագիկ Մակարյանն ու հավելում, որ սրա արժեւորումն արտահանողներին միանշանակ ձեռընտու է, իսկ ինչ վերաբերում է ներմուծողներին, նրանք կարող են, որոշակիորեն, տուժել: 

Մանրամասները՝ Ալինա Սիմոնյանի տեսանյութում