կարևոր
706 դիտում, 1 ամիս առաջ - 2022-05-28 19:18

Շնորհավորական ուղերձներ Հայաստանի առաջին հանրապետության օրվա կապակցությամբ․ ՏԵՍԱՆՅՈՒԹ

Ամենայն հայոց Կաթողիկոսն իր պատգամն է հղել հայ ժողովրդին` հաղթահարել բարդ մարտահրավերները: Նրա գնահատմամբ՝ Առաջին հանրապետությունը դարձավ մարմնավորումն այն մեծ տեսիլքի, որի ներշնչումով կերտվեցին հետագա մեր հաղթանակները՝ մայիսյան հերոսամարտերից մինչեւ առաջին արցախյան պատերազմը: 
«Առաջին հանրապետության ծնունդը Հայաստանի պատմության շրջադարձային էջերից է»,- ասված է նախագահ Վահագն Խաչատուրյանի ուղերձում: 
Հանրապետության երրորդ նախագահն էլ իր ուղերձում ընդգծել է՝ հուսահատության եւ բնաջնջման եզրին կանգնած մեր ժողովրդի համար մայիսյան հաղթանակները ապրելու, արարելու եւ համազգային նպատակները կյանքի կոչելու նոր հնարավորություն դարձան: Սերժ Սարգսյանի խոսքով այսօր մեր ժողովուրդը կրկին նույն ընտրության առջեւ է: 
Երկրորդ նախագահ Ռոբերտ Քոչարյանը նույնպես շնորհավորական խոսք է հրապարակել: 
«Օրհասական է պահը»,- նշված է ՀՅԴ Հայաստանի Գերագույն մարմնի հայտարարության տեքստում: Ուստի պատասխանատու ենք մեր նախնիների առջեւ եւ պարտք` ապագա սերունդներին: 
«Հայաստան» խմբակցության ղեկավար, պաշտպանության նախկին նախարար Սեյրան Օհանյանը շնորհավորելով բոլորին նշել է, որ ինչպես անցյալ դարասկզբին, այնպես էլ այսօր մենք կանգնած ենք նույն սպառնալիքների առջեւ: Սակայն, Օհանյանը վստահ է՝ հայոց ազգը վերագտնելու է իր միասնությունը, մարտական ոգին: 
Արցախի նախագահն էլ կոչ է անում յուրաքանչյուրին իր կարողությունների սահմանում անել հնարավորը` հանուն հայոց պետականության զորացման, հանուն հայ ժողովրդի հավերժական ու անխափան երթի: 
«Պետականության ստեղծման մեր ճանապարհը հեշտ չի եղել, այժմ էլ հեշտ չէ պետականության պահպանման, ամրապնդման ու արժեվորման մեր ուղին»,- նշել է Մարդու իրավունքների պաշտպանը: 

Մանրամասները ներկայացնում է Ալինա Սիմոնյանը