Դատարանը հետաձգեց Գերասիմ Վարդանյանի կալանքի որոշումը՝ նրա վարքագծի փաստերն ուսումնասիրելու համար․ ՏԵՍԱՆՅՈՒԹ

Գերասիմ Վարդանյանի կալանքի որոշումը կայացնելու համար դատարանը չհեռացավ խորհրդակացան սենյակ, այլ նիստը հետաձգեց՝ նոր ներկայացված փաստերն ամբողջ ծավալով ուսումնասիրելու համար՝ Yerkir.am-ի հետ հարցազրույցում ասել է Վարդանյանի փաստաբան Բենիկ Գալստյանը։

Նա նշեց, որ ինքը էլեկտրոնային եղանակով մի շարք փաստաթղթեր ներկայացրեց նիստի ընթացքում, որոնք հաստատում էին, որ այս ընթացքում Գերասիմ Վարդանյանը դրսևորել է պատշաճ վարքագիծ։

«Խնդիրն այն է, որ քննիչը տեխնիկական հնարք էր կիրառել մայիսի 4-6-ը ներառյալ՝ ներկայանում էինք քննիչի մոտ, ճանապարհում էր, մի քանի ժամ հետո ծանուցագիր էր ուղարկում՝ նորից ներկայանալու․ այդպես մի 3 օր մեզ հետ շախմատ էր խաղում։ Մենք էլ լրատվամիջոցներով, էլեկտրոնային հաղորդագրություններով  ցույց էինք տալիս, որ գնում էինք՝ չէր ընդունում, և ամսի 6-ից հետո հասկացավ, որ մեզ հետ այդպես չի ստացվում ու դադարեցրեց։ Հենց այդ փաստերը ցույց տվեցինք դատարանին։ Քննիչը շատ անկեղծ դուրս եկավ՝ իմ նշած բոլոր հանգամանքերը հաստատեց, և դատարանը չհեռացավ խորհրդակցական սենյակ, ասաց՝ պետք է նյութերը ևս մեկ անգամ ուսումնասիրեմ ամբողջ ծավալով, նոր որոշում կայացնեմ»,-մանրամասնել է Բենիկ Գալստյանը։

Դատարանի որոշումը կհրապարակվի մայիսի 12-ին՝ ժամը 11։00-ին։

Ավելի վաղ հայտնել էինք, որ Բենիկ Գալստյանը բացարկ էր հայտնել Գերասիմ Վարդանյանի քրեական գործով քննչական խմբի ղեկավարին, որից հետո որոշում է կայացվել Գերասիմ Վարդանյանի նկատմամբ որպես խափանման միջոց ընտրել 60 մլն դրամ, ինչը, սակայն, Վարդանյանը չի կարողացել վճարել և այժմ դատարանը քննում է նույն գործով արդեն չորրորդ կալանքի միջնորդությունը, և դա անում է Փաշինյանի երթի թմբկահար դատավոր Դավիթ Արղամանյանը։

Հիշեցնենք որ Գերասիմ Վարդանյանը ձերբակալվել էր 2020 թվականի նոյեմբերի 9-ի դեպքերով հարուցված քրեական գործով։

Մանրամասն՝ տեսանյութում․