կարևոր
517 դիտում, 2 շաբաթ առաջ - 2022-05-03 19:15

Կաթվածահար մայրաքաղաքը․ ՏԵՍԱՆՅՈՒԹ

Իշխան Սաղաթելյանի կոչով էլ վաղ առավոտյան մեկնարկեց անհնազանդության գործությունների երկրորդ օրը: Կարճ ժամանակ անց Երեւանում երթեւեկությունը կաթվածահար էր: Այս անգամ անելիք ունեին նաեւ վարորդները. շարժման մասնակիցները նրանց հորդորում էին անհնազանդությունն արտահայտել շատ դանդաղ երթեւեկելով: 
Ինչպես եւ առաջին օրը, ոստիկանները փորձում էին փողոցները բացել ուժի կիրառմամբ, ակցիայի մասնակիցներին բերման ենթարկելով: Այս անգամ՝ ըստ Ոստիկանության պաշտոնական տվյալների միայն Երեւանում 155 քաղաքացի է բերման ենթարկվել: 
Ի դեպ՝ փողոց փակողների շարքերում էին նաեւ պատերազմի ընթացքում հաշմանդամություն ձեռք բերած քաղաքացիները: 
Հաջորդ փուլն արդեն իրազեկման երթն էր: Մի քանի ժամ Դիմադրության շարժման անդամները քայլում էին մայրաքաղաքի փողոցներով, պատուհաններից, պատշգամբներից, նաեւ մեքնենաների ազդանշաններով իրենց ողջունող քաղաքացիներին հորդորում էին՝ միանալ: 
Երեւանի թատրոնի եւ կինոյի պետական ինստիտուտի ուսանողներն են. հստակ գործուղություններով արձագանքեցին միանալու կոչին: Ի դեպ՝ Երեւանի պետական համալսարանի ուսանողներն ահազանգել էին, որ մի շարք ֆակուլտետներում դռները փակել էին՝ թույլ չտալով նրանց շենքից դուրս գալ: 
Բացառություն էր Արեւեալգիտության ֆակուլտետը. դռները բաց էին, քանի որ ներսում լսարանների մեծ մասը դատարկ էր. ուսանողները դասադուլ էին անում: 
Դիմադրության շարժմանը ողջունեց նաեւ Հյուսիսային համալսարանի անձնակազմը: Օրեր առաջ այս համալսարանի բակում Արցախի դրոշը տեղադրելուն խոչընդոտող ռեկտորին դիմեց Իշխան Սաղաթելյանը: 
Երթն ավարտվեց Ֆրանսիայի հրապարակում: Շարժման անդամները ճանապարհին իրենց ողջունող աջակիցների հետ պայմանավորվեցին հանդիպել այստեղ՝ երեկոյան հանրահավաքին: 

Մանրամասները ներկայացնում է Անահիտ Հովհաննիսյանը