Ոստիկանները ցուցարարներին բերման ենթարկեցին

Բժշկական սպիտակ խալաթներով ու ախտահանիչ միջոցներով՝ Ազատագրական շարժման անդամները բողոքի իրազեկման ակցիա իրականացրին Կառավարության շենքի մոտ։

Նրանք ախտահանեցին ՀՀ կառավարության շենքը, որպեսզի ազատագրվենք այլասերումից։

«Ներկա իշխանությունների այլասերվածությունը փորձում է ներխուժել մեր առօրյա։ Այսօրվա մեր իրազեկման ակցիան ուղղված է հենց դրան»,-ասաց Ազատագրական շարժման նախաձեռնողներից Արա Զոհրաբյանը։

Վահագն Չախալյանը հավելեց, որ բժշկական միջամտություն են իրականցնելու և ախտահանելու են այն սուբյեկտին, ով դրա հեղինակն է։

«Մենք պատրաստվում ենք ազատագրվել այլասերումից և ախտահանել կառավարության շենքը և մեր հիվանդին վերադարձնել իր բնակության վայր»,-ասաց Չախալյանը։

Ակցիայի ընթացքում ոստիկանները հայհոյանքներով հարձակվեցին խաղաղ ցուցարարների վրա։ Ազատագրական շարժման ակտիվիստներից Վազգեն Պետրոսյանին, Վահագն Չախալյանին և մոտ մեկ տասնյակ այլ անձանց բռնի ուժով նստեցրին մեքենան ու տարան։

«Ոստիկաններին ևս ախտահանել է պետք»՝ գոչեցին ակցիայի մասնակիցները։

Ավելի վաղ հայտնել էինք, որ Ազատագրական շարժման անդամները բողոքի իրազեկման ակցիա են իրականացնում Հանրապետության հրապարակում։