կարևոր
550 դիտում, 1 ամիս առաջ - 2022-04-21 21:03

Թաթուլ Կրպեյանի հուշարձանի մոտ երդվել են ՀՅԴ մի խումբ նորագիրներ․ ՏԵՍԱՆՅՈՒԹ

Թաթուլ Կրպեյանի անունը կրող այգում, Ազգային հերոսի հուշարձանի մոտ, նրա ծննդյան օրվա առիթով չորս երիտասարդներ երդվեցին հավատարիմ մնալ դաշնակցության գաղափարախոսությանը: Մինչ երդման արարողությունը ՀՅԴ Հայաստանի Գերագույն մարմնի անդամ Իգոր Սարգսյանը հարցերով դիմեց նորագիրներին։ 
ՀՅԴ «Նիկոլ Աղբալյան» ուսանողական միության նորընծա անդամները երդվեցին ազգային հերոսի զենքին եւ եռագույն դրոշին խոնարհված: Երդվեցին հարկ եղած դեպքում կյանքի գնով ծառայել Հայաստանի ազատագրության դատին։ 
Նորագիրներին առաջինը շնորհավորեց Թաթուլ Կրպեյանի դուստրը՝ Ասպրամ Կրպեյանը: Նա նշեց, որ անսահման հպարտ է այսօրվա երիտասարդներով եւ վստահ է, որ նրանք կնվիրվեն ազատ, անկախ, միացյալ Հայաստանի գաղափարին: Ասպրամ Կրպեյանը հորը չի հիշում, քանի որ նրա զոհվելու ժամանակ ընդամենը մեկ տարեկան երկու ամսական է եղել: Բայց հոր մասին բազմաթիվ պատմություններ է լսել, հպարտ է, որովհետեւ հայրը նախ եւ առաջ ուսուցիչ էր։ 
Նաիրա Գալստյանի համար երդվելը կարեւոր եւ սուրբ առաքելություն է: Նա վստահ է իր ուժերի վրա՝ համախմբան համար պատրաստ է գործել։ 
Թաթուլ Կրպեյանը զոհվել է 1991 թվականի ապրիլի 30-ին՝ «Օղակ» գործողության ժամանակ:1996 թվականի սեպտեմբերի 20-ին արժանացել է ՀՀ Ազգային հերոսի կոչմանը: 
Թաթուլն ասում էր. Ինչու եք վախենում մահից: Հողի համար ես հենց հիմա պատրաստ եմ մեռնելու: Հողի, ազգի համար: Ես ոչ մի անգամ չեմ գնա Երեւանի օդանավակայանում իջնեմ, ասեմ՝ Գետաշենը հանձնեցի: Ես այստեղ կը մեռնեմ, այդ բանը չեմ անի...

Մանրամասները ներկայացնում է Լուսին Ղազարյանը