Հունգարիայում «ՖԻԴԵՍ» կուսակցությունը հաղթել է ընտրություններում․ Վիկտոր Օրբանը կմնա վարչապետի պաշտոնում

Հունգարիայի իշխող «ՖԻԴԵՍ-Հունգարական քաղաքացիական միություն» կուսակցությունը վարչապետ Վիկտոր Օրբանի գլխավորությամբ հաղթել է հերթական խորհրդարանական ընտրություններում, որոնք անցկացվել են մարտի 3-ին։ «ՖԻԴԵՍ»-ը դաշնակցի՝ Քրիստոնեա-դեմոկրատական ժողովրդական կուսակցության հետ կարող է ստանալ խորհրդարանի 199 մանդատից 135-ը,  հաղորդում է ՏԱՍՍ գործակալությունը՝ հղում անելով Հունգարիայի Ազգային ընտրական բյուրոյին։

Իշխող կուսակցական դաշինքը կպահպանի Հունգարիայի օրենսդիր մարմնում սահմանադրական մեծամասնությունը, ինչը կարևորագույն նշանակություն կունենա նոր կառավարության օրակարգի կյանքի կոչման համար։ Նշենք, որ 58-ամյա Օրբանն արդեն չորրորդ անգամն է անընդմեջ վարչապետ ընտրվում։

Ընտրություններին նախորդած հարցումներն արդեն իսկ կանխատեսել էին արդյունքները։ Օրբանիը հայտարարել էր, որ ամեն ինչից վեր է դասում իր երկրի շահերը, հրաժարվել էր զենք մատակարարել Կիևին և դեմ էր արտահայտվել ռուսական նավթի և գազի գնման էմբարգոյի սահմանմանը՝ միևնույն ժամանակ դատապարտելով Ուկրաինայում ՌԴ-ի գործողությունները և միանալով Մոսկվայի դեմ ԵՄ-ի սահմանած այլ պատժամիջոցներին։

Օրբանը նաև մեղադրել էր քաղաքական ընդդիմությանը Հունգարիային ռուս-ուկրաինական կոնֆլիկտի մեջ ներքաշելու փորձերի և ընտրությունների արդյունքների վրա ազդելու նպատակով Կիևի իշխանությունների հետ համաձայնության մեջ մտնելու համար։ Հայտարարելով, որ Հունգարիայի քաղաքացիներին սպասվում է ընտրություն պատերազմի ու խաղաղության միջև՝ Օրբանը կարողացել է ոչ միայն համախմբել «ՖԻԴԵՍ»-ի կողմնակիցներին, այլև ստանալ դեռ չկողմնորոշված ընտողների աջակցությունը։