կարևոր
4948 դիտում, 2 ամիս առաջ - 2022-03-02 13:30

Մենք գործ ունենք մի անձի հետ, որը որևէ առնչություն չունի ՀՀ նախագահի կարգավիճակի հետ. Վարդևանյան

Մենք գործ ունենք մի անձի հետ, որը որևէ առնչություն չունի ՀՀ նախագահի կարգավիճակի հետ. Վարդևանյան

«Այսօր ԱԺ-ում չի ընտրվում ՀՀ նախագահ, այլ ընտրվում է ՔՊ կուսակցության նախագահ»,- ԱԺ ճեպազրույցում հայտարարեց «Հայաստան» խմբակցության պատգամավոր Արամ Վարդևանյանը:

Պատգամավորը նշեց, որ «Հայաստան» և «Պատիվ ունեմ» խմբակցությունները հստակ դիրքորոշում են հայտնել, որ չեն մասնակցելու ՀՀ նախագահի ընտրության այս գործընթացին, քանի որ այն ի սկզբանե սկսվել էր այնպիսի խախտումներով, Սահմանադրության տառին և ձևին այնպիսի հակասություններով, որ դրան որևէ ձևով մասնակցությունը կլիներ անտրամաբանական:

«Դուք պատկերացնո՞ւմ եք, թե ինչպես պետք է այս իշխանության թեկնածուն նախագահի լիազորություները կատարի, երբ քաղաքական թիմի, կառավարության անդամ է, մասնակցել է կառավարության նիստերին, որտեղ քննարկվել են օրինագծեր, որոնք հետագայում ճանաչվել են Սահմանադրությանն հակասող ու անվավեր, մի մասն էլ հասել է ԱԺ և հետ է կանչվել, բայց Վահագն Խաչատուրյանն այդ բոլոր օրինագծերին կողմ է քվեարկել»:

Արամ Վարդևանյանը հայտնեց, որ ՀՀ նախագահի ընտրության գործընթացին ընդդիմադիր պատգամավորները չեն մասնակցում, այլ այդ ընթացքում նախապատրաստում են ճանապարհատրանսպորտային տուգանքների բալային համակարգի և այլ օենքների մասով ՍԴ դիմելու նախագծեր, ինչպես նաև մշակում են այլ օրենսդրական նախաձեռնություններ:

Հիշեցնենք, որ այսօր ԱԺ «Հայաստան» եւ «Պատիվ ունեմ» խմբակությունները, ինչպես և նախապես հայտնել էին, բոյկոտեցին նախագահի ընտրության հարցով ԱԺ քննարկումը։ 

«Քաղաքացիական պայմանագիր» խմբակցությունն այս պաշտոնում առաջադրել է Բարձր տեխնոլոգիական արդյունաբերության նախարար, Երեւանի նախկին քաղաքապետ Վահագն Խաչատրյանի թեկնածությունը։ Նա միակ թեկնածուն է։ 1992-1996 թվականներին Վահագն Խաչատուրյանը եղել է Երևանի քաղաքապետ, իսկ 1996-1999 թվականներին՝ ԱԺ պատգամավոր: 1996-1998 թթ.-ին Լևոն Տեր-Պետրոսյանի խորհրդականն էր: 2019 թ.-ից մինչ նախարար դառնալը գործարար, այժմ «Քաղաքացիական պայմանագիր» իշխող խմբակցության պատգամավոր Խաչիկ Սուքիասյանին պատկանող «Հայէկոնոմբանկի» խորհրդի անդամ էր: 2021 թ. օգոստոսի 4-ին նշանակվել է Բարձր տեխնոլոգիական արդյունաբերության նախարար:

Առաջին փուլում նախագահ է ընտրվում այն թեկնածուն, որը ստացել է պատգամավորների ընդհանուր թվի ձայների առնվազն երեք քառորդը: Անհրաժեշտ ձայների թիվը, ներկայիս 107 պատգամավորի դեպքում, կազմում է 80,25 ձայն, սակայն ՔՊ-ական պատգամավորների թիվը 71 է: Ըստ Սահմանադրության, եթե Հանրապետության նախագահ չի ընտրվում, ապա տասնօրյա ժամկետում անցկացվում է նախագահի նոր ընտրություն` նույն փուլերով։

Երկրորդ փուլում արդեն ընտրված է համարվում ձայների երեք հինգերորդը ստացած թեկնածուն։ Երրորդ փուլին արդեն կարող է մասնակցել երկրորդ փուլում առավել ձայներ ստացած երկու թեկնածուն: Երրորդ փուլում Հանրապետության նախագահ է ընտրվում այն թեկնածուն, որն ստանում է պատգամավորների ընդհանուր թվի ձայների կեսից ավելին

Հիշեցնենք, որ հունվարի 23-ին ՀՀ նախագահ Արմեն Սարգսյանը հրապարակայնորեն հրաժարական է տվել` պատճառաբանելով, որ նախագահը չունի անհրաժեշտ գործիքներ՝ երկրի և ազգի համար ներկայիս բարդ ժամանակներում ազդելու ներքին և արտաքին քաղաքականության արմատական գործընթացների վրա։ Այսօր երկրի նախագահի լիազորություններն անցել են ԱԺ նախագահ Ալեն Սիմոնյանին, մինչ նոր նախագահի ընտրությունները: