Երկխոսության փոխարեն Եվրոպան ընտրել է «ոչ լեգիտիմ պատժամիջոցների ճանապարհը». Լավրով

Լավրովն Արևմուտքին մեղադրել է հակամարտության սրման մեջ: Ռուսաստանի արտգործնախարար Սերգեյ Լավրովը հայտարարել է, որ Ուկրաինայում առկա ներկայիս իրավիճակը «Կիևի հանցավոր ռեժիմին արևմտյան երկրների թողտվության արդյունքն է»։  Այս մասին այսօր հայտարարել է ՌԴ ԱԳ նախարարը՝ ելույթ ունենալով Զինաթափման հարցերով ՄԱԿ-ի համաժողովում և ՄԱԿ-ի Մարդու իրավունքների խորհրդի նիստում տեսաուղերձներով։   

Ռուս նախարարն ընդգծել է, որ Արևմուտքը «կորցրել է ինքնատիրապետումը»՝ փորձելով զայրույթը թափել Մոսկվայի վրա, և Կիևին զենքի նոր մատակարարումների մասին որոշումը կայացվել է « ռուսաֆոբ կատաղության» ազդեցությամբ: .

Ուկրաինայում գործողությունների մասին Լավրովը հետևյալ շեշտադրումներն է արել. 

• Նրանք, ովքեր Կիևում գրավել են իշխանությունը, արևմտյան երկրների թողտվությամբ, «իրական տեռոր են սանձազերծել», այդ թվում՝ ռուսալեզու քաղաքացիների նկատմամբ։
• «Մեր գործողությունների նպատակն է փրկել մարդկանց <...>, ինչպես նաև Ուկրաինայի ապառազմականացումն ու ապաազգայնացումը, որպեսզի դա երբեք չկրկնվի»։
• Միաժամանակ Ռուսաստանը չի պատրաստվում «ոչ մի կերպ ոտնահարել Ուկրաինայի քաղաքացիների շահերը». «Միասին մենք միշտ եղել ենք և կլինենք բազմապատիկ ավելի ուժեղ և հաջողակ»։

Նրա խոսքով՝ Եվրոպան երկխոսության փոխարեն ընտրել է «ոչ լեգիտիմ պատժամիջոցների ճանապարհը»։ Արեւմուտքի պատժամիջոցների մասին Լավրովն ասել է. 

• «Արևմուտքն ակնհայտորեն գնաց իր ստեղծած բոլոր ինստիտուտների և կանոնների ոչնչացմանը, ներառյալ սեփականության անձեռնմխելիությունը: Պատժամիջոցներն այլևս չեն սահմանափակվում տնտեսությամբ, դրանք վերաբերում են մշակույթին, սպորտին, զբոսաշրջությանը, կրթությանը, տեղեկատվական ոլորտին և «ընդհանուր առմամբ՝ մարդկանց միջև բոլոր շփումներին»։
• ԵՄ երկրները, ընտրելով պատժամիջոցների ուղին, «փորձում են հեռու մնալ ազնիվ երկխոսությունից դեմ առ դեմ, անմիջական շփումներից, որոնք կոչված են օգնելու գտնել միջազգային սուր խնդիրների քաղաքական լուծումներ»։
• Բրյուսելի միջոցառումները, որոնք ամբողջությամբ փակեցին համայնքի օդային տարածքը ռուսական ինքնաթիռների համար, վրդովեցուցիչ են, քանի որ դա մերժում է հարգել «մարդու հիմնարար իրավունքներից մեկը՝ ազատ տեղաշարժի իրավունքը»։ Ավելին, «օրերս Եվրամիությունը ռուսաֆոբ մոլեգնած վիճակում որոշեց Կիեւին մահաբեր զենք մատակարարել»։

Լավրովը հայտարարել է, որ Արևմուտքը պատրաստակամություն ցույց չի տալիս Ռուսաստանին ներկայացնել անվտանգության երաշխիքներ և հրաժարվել ՆԱՏՕ-ի ընդլայնումից։ 

«Արևմտյան երկրները պետք է հրաժարվեն նախկին ԽՍՀՄ անդամ երկրների տարածքներում ռազմական օբյեկտներ ստեղծելուց, ներառյալ ցանկացած ռազմական գործողության վարում նրանց ենթակառուցվածքներից»,- ասել է Լավրովը։

Նա նաև հայտարարել է, որ Ռուսաստանը չի ունեցել և չունի ցամաքային միջին և փոքր հեռահարության հրթիռներ: «Ցանկանում եմ ընդգծել, որ Ռուսաստանը չի ունեցել և չունի ցամաքային միջին և փոքր հեռահարության հրթիռներ, հակառակը պնդել՝ նշանակում է դիտավորյալ կեղծ պատկեր ստեղծել, կոծկել իրական մեղավորների գործողությունները, որոնք իրապես մեղավոր են Միջին և փոքր հեռահարության հրթիռների վերացման մասին պայմանագրի ոչնչացման համար»,- ասել է նա Ժնևում Զինաթափման կոնֆերանսի ժամանակ իր տեսաուղերձում։

Լավրովը հիշեցրել է, որ Միջին և փոքր հեռահարության հրթիռների վերացման մասին պայմանագրի դադարեցման համատեքստում հրթիռային ոլորտում կանխատեսելիություն և զսպվածություն ապահովելու համար Ռուսաստանը միակողմանի պարտավորություն է ստանձնել՝ չտեղակայել առաջին անգամ Պայմանագրի տակ հայտնված համակարգերն այն տարածաշրջաններում, որտեղ չեն տեղակայվի ամերիկյան արտադրության նմանատիպ զինատեսակները։ «Մենք կոչ ենք անում ԱՄՆ-ին և նրա դաշնակիցներին՝ հետևել մեր օրինակին»,- ասել է Լավրովը։

«Ռուսաստանն անընդունելի է համարում, որ ԱՄՆ միջուկային զենքը գտնվում է Եվրոպայում, ժամանակն է, որ այն հետ տարվի: Մեզ համար անընդունելի է, որ Միջուկային զենքը չտարածելու մասին պայմանագրի հիմնարար դրույթներին հակառակ` ԱՄՆ միջուկային զենքը դեռ գտնվում է եվրոպական մի շարք երկրների տարածքում։ Պահպանվում է «համատեղ միջուկային առաքելությունների» արատավոր պրակտիկան` ՆԱՏՕ-ի ոչ միջուկային երկրների մասնակցությամբ: Դրանց շրջանակներում մշակվում են ՌԴ–ում միջուկային զենքի կիրառման սցենարներ: Վաղուց ժամանակն է տուն վերադարձնել ամերիկյան միջուկային զենքը և ամբողջությամբ վերացնել դրա հետ կապված ենթակառուցվածքը Եվրոպայում»,- ասել է Լավրովը:

Չնայած աշխարհում տիրող իրավիճակին, Ռուսաստանը դեռ հույս ունի, որ միջուկային զենքի չտարածման պայմանագրի վերաբերյալ բազմիցս հետաձգված խորհրդաժողովը կկայանա մինչև տարեվերջ և կոչ է անում պահպանել սպառազինությունների վերահսկման համակարգը որպես ամբողջություն. ներկա պայմաններում անհրաժեշտ է հրաժարվել սպառազինությունների վերահսկման, չտարածման և զինաթափման ճարտարապետության ապամոնտաժմանն ուղղված ցանկացած գործողություններից։