կարևոր
3361 դիտում, 2 ամիս առաջ - 2022-02-21 13:20

ՔՊ-ն, ըստ էության, կողմ է, որ Արցախը մնա Ադրբեջանի կազմում. Աննա Գրիգորյան

ՔՊ-ն, ըստ էության, կողմ է, որ Արցախը մնա Ադրբեջանի կազմում. Աննա Գրիգորյան

«Պարո՛ն Արսենյան, մեկ նախադեսության մեջ հինգ անգամ խաղաղություն բառն արտասանելով,  խաղաղության չեն հասնում։ Երբ դուք խոսում եք, որ խաղաղության, կայունության օրակարգով եք գնում, և փաստացի ուզում եք պնդել, որ դատապարտող հայտարարությունը կամ խորը մտահոգություն արտահայտող այս մեկ բանաձևը խաթարելու է խաղաղությունը Ձեր պատկերացմամբ, ապա այդ համատեքստում չի՞ խաթարում արդյոք Շուշիի հռչակագիրը երկու երկրների միջև հարաբերությունների կարգավորմանը»։ Դիմելով ՔՊ-ական պատգամավոր Գուրգեն Արսենյանին՝ ասաց «Հայաստան» խմբակցության պատգամավոր Աննա Գրիգորյանը։ 

««Քաղաքացիական պայմանագիր»  կուսակցությունը, երբ որոշում է կայացրել չդատապարտել  «Շուշիի հռչակագիրը», ըստ էության, կողմ է հռչակագրին, կողմ է նրան, որ Արցախը մնա Ադրբեջանի կազմում, կողմ է որպեսզի «Զանգեզուրյան միջանցքն» իրականություն դառնա, կողմ է, որպեսզի  Հայաստանը հետ կանգնի ցեղասպանության ճանաչման և դատապարտման  քաղաքականությունից»,- ԱԺ արտաքին հարաբերությունների մշտական հանձնաժողովի նիստում «Հայաստան» խմբակցության հեղինակած Ադրբեջանի և Թուրքիայի խորհրդարանների կողմից «Շուշիի հռչակագրի» վավերացման կապակցությամբ հայտարարության նախագծի քննարկմանն ասաց «Հայաստան» խմբակցության պատգամավոր Աննա Գրիգորյանը։

Նա ընդգծեց, որ այսքան բացահայտ քաղաքականություն թուրք-ադրբեջանական տանդեմի հետ, ուղղակի դժվար էր պատկերացնել նույնիսկ ՔՊ-ի պարագայում, բայց այս ամենն արդեն իրականություն է։

ԱԺ արտաքին հարաբերությունների մշտական հանձնաժողովում քննարկման վերջում ՔՊ անդամներն ձեռնպահ քվեարկեցին թուրք-ադրբեջանակն հռչակագիրը դատապարտող հայտարարություն ընդունելուն. կողմ քվեարկեց հանձնաժողովի ընդդիմադիր 4 պատգամավոր, իսկ «Քաղաքացիական պայմանագիր» խմբակցության 6 պատգամավոր ձեռնպահ մնաց։ Նախագիծն, այնուհանդերձ, ընդգրկված է փետրվարի 23-ին ԱԺ արտահերթ նիստի օրակարգում: 

Հիշեցնենք, որ Շուշիի հռչակագիրը ստորագրվել էր 2021 թ. հունիսի 15-ին Ադրբեջանի վերահսկողության տակ անցած Շուշի քաղաքում՝ Իլհամ Ալիեւի եւ Ռեջեփ Թայիփ Էրդողանի կողմից։ Պատահական չէր ընտրված այցելության օրը. հունիսի 15-ը տոն է Ադրբեջանում, նշվում է «Ադրբեջանական ժողովրդի Ազգային Փրկության օրը»: 28 տարի առաջ այդ օրը Հեյդար Ալիեւը ընտրվեց Ադրբեջանի Հանրապետության Գերագույն խորհրդի նախագահ ու հաստատեց միահեծան իշխանություն:

Շուշիի հռչակագրի հիմքում թուրք-ադրբեջանական ընդհանուր օրակարգն է։ Ալիեւն ասել է, որ Շուշիի հռչակագիրը նոր մակարդակ կհաղորդի երկու երկրների հարաբերություններին: Հռչակագրով նախատեսվում է ամրապնդել համագործակցությունը Թուրքիայի հետ ռազմական արդյունաբերության եւ փոխադարձ ռազմական օգնության ոլորտում: Ըստ Ալիևի` ստորագրված փաստաթուղթը հստակ դրույթներ է պարունակում Զանգեզուրի միջանցքի վերաբերյալ և հավելել, որ Հռչակագիրը հիմնված է Կարսի պատմական պայմանագրի վրա:

Փաստաթուղթը չի շրջանցում նաեւ Հայոց ցեղասպանության թեման՝ այն համարելով «պատմությունը խեղաթյուրելու, տարածաշրջանում խաղաղությունն ու կայունությունը վնասելու փորձեր»: