կարևոր
1933 դիտում, 2 ամիս առաջ - 2022-02-20 20:41

Կիևը համառորեն հրաժարվում է ձեռք բերված պայմանավորվածությունների իրագործումից. Պուտինը խոսել է Մակրոնի հետ

Կիևը համառորեն հրաժարվում է ձեռք բերված պայմանավորվածությունների իրագործումից. Պուտինը խոսել է Մակրոնի հետ

Ռուսաստանի Դաշնության նախագահ Վլադիմիր Պուտինը և Ֆրանսիայի Հանրապետության նախագահ Էմանուել Մակրոնն այսօր քննարկել են Ուկրաինայի շուրջ ստեղծված իրավիճակը:

Ինչպես հաղորդում է Կրեմլը, նախագահների հեռախոսազրույցը կայացել է ֆրանսիական կողմի նախաձեռնությամբ: Տեղի է ունեցել կարծիքների հանգամանալից փոխանակում Ուկրաինայի շուրջ ստեղծված իրավիճակի, ինչպես նաև Ռուսաստանի Դաշնության անվտանգության երկարաժամկետ իրավական երաշխիքների մշակման շուրջ:

Կողմերը լուրջ մտահոգություն են հայտնել Դոնբասի շփման գծում իրադրության կտրուկ վատթարացման կապակցությամբ: Ռուսաստանի նախագահը նշել է, որ էսկալացիայի պատճառ են դարձել ուկրաինացի ուժայինների սադրանքները։

«Ուշադրություն է հրավիրվել ՆԱՏՕ-ի երկրների կողմից Ուկրաինան ժամանակակից սպառազինությամբ և ռազմամթերքներով ապահովելուն, ինչը Կիևին մղում է, այսպես կոչված, Դոնբասի խնդրի ռազմական լուծմանը։ Արդյունքում տուժում են Դոնեցկի և Լուգանսկի հանրապետությունների խաղաղ բնակիչները, որոնք ստիպված են ռմբակոծություններից փրկվելու համար տարհանվել Ռուսաստան»,-ասված է հաղորդագրության մեջ։

Պուտինն ընդգծել է, որ Կիևը համառորեն հրաժարվում է Մինսկի համաձայնագրերի և «Նորմանդական ձևաչափով» ձեռք բերված պայմանավորվածությունների իրագործումից:

Հաշվի առնելով ստեղծված իրավիճակի սրությունը՝ նախագահները նպատակահարմար են գտել ակտիվացնել որոշումների որոնումը դիվանագիտական միջոցներով՝ «Նորմանդական ձևաչափի» մասնակից երկրների ղեկավարների արտաքին քաղաքական գերատեսչությունների և քաղաքական խորհրդականների գծով:

Այդ շփումները կոչված են նպաստելու հրադադարի ռեժիմի վերականգնմանն ու առաջընթացի ապահովմանը Դոնբասի շուրջ հակամարտության կարգավորման գործում։

Կրեմլի տեղեկատվության համաձայն՝ Պուտինը կրկին ընդգծել է այն բանի անհրաժեշտությունը, որ ԱՄՆ-ն և ՆԱՏՕ-ն ամենայն լրջությամբ վերաբերվեն անվտանգության երաշխիքների ապահովման Ռուսաստանի պահանջներին և դրանց արձագանքեն կոնկրետ և ըստ էության:

Ռուսաստանի և Ֆրանսիայի նախագահները պայմանավորվել են շարունակել շփումները տարբեր մակարդակներում: