կարևոր
3487 դիտում, 2 ամիս առաջ - 2022-02-19 10:18

Ադրբեջանցիները կրակել են Թաղավարդի տների վրա

Ադրբեջանցիները կրակել են Թաղավարդի տների վրա

Երեկ երեկոյան թշնամին կրկին կրակոցներ  է արձակել Արցախի Հանրապետության Թաղավարդ գյուղի ուղղությամբ: Արցախի Հանրապետության դատախազությունից հայտնում են, որ  փետրվարի 18-ին, ժամը 17։00-ի սահմաններում, Արցախի Հանրապետության Մարտունու շրջանի Թաղավարդ համայնքի հարևանությամբ տեղակայված ադրբեջանական դիրքից թիրախավորվել ու հրազենային կրակոցներ են արձակվել հիշյալ համայնքի բնակելի տների ուղղությամբ:

Արձակված գնդակները վնասել են տների պատերի արտաքին մասերը, իսկ գնդակներից մեկը խոցել է բնակիչներից մեկի բնակարանի պատուհանը և թափանցել ներս։

«Դեպքից անմիջապես հետո հետաքննության մարմնի աշխատակիցները մեկնել են Թաղավարդ համայնք և փաստագրել հանցագործության հետևանքներն ու ամրագրել ապացույցները։ Դեպքի մասին դատախազության կողմից հաղորդվել է Արցախում ռուսական խաղաղապահ զորակազմում ընդգրկված դատախազին, ինչպես նաև փոխանցվել են դեպքի նախնական ապացույցները»,- հայտնում են դատախազությունից։ 

Հիշեցնենք, որ Կարմիր շուկա և Թաղավարդ համայնքների հարևանությամբ տեղակայված ադրբեջանական դիրքերից կրակոցներ էին արձակվել նաև փետրվարի 11-ին։