կարևոր
3331 դիտում, 3 ամիս առաջ - 2022-02-18 15:33

Այսօր եզդիները նշում են Սիրո տոնը. ավանդական տոնի խորհուրդը

Այսօր եզդիները նշում են Սիրո տոնը. ավանդական տոնի խորհուրդը

Այս շաբաթ եզդիները նշում են սիրո հովանավոր Խըդըր Նավի և Խըդըր Էյլաս սուրբ հրեշտակների տոնը։ Այն նվիրված է երազանքներ իրականացնող և սիրո բարեխոս, եզդիների սուրբ Խըդըր ՆավիինՏոնը նշվում է յուրաքանչյուր տարվա փետրվարի 13-ի հաջորդող ուրբաթ օրը։ Տոնը համարժեք է Հայ Առաքելական Սուրբ Եկեղեցու կողմից նշվող Սուրբ Սարգիս տոնին։

Տոնին նախորդում են երեքօրյա ծոմերը, որոնք եզդիները անվանում են «ռոժի»։ Ծոմի նպատակը ինքնամաքրվելն է։ Եզդիները արթնանում են գիշերը՝ դեռևս լույսը չբացված, սնվում են ու ապա նորից քնում։ Լուսաբացից մինչև մայրամուտ չեն սնվում։ Այսպես երեք օր շարունակ՝ երեքշաբթի, չորեքշաբթի և հինգշաբթի։

Հինգշաբթի երեկոյան սկսվում է «Լայլա Կադր» տոնակատարությունը, որը ներառում է հետևյալ ավանդույթները՝

- Երիտասարդները գիշերը ուտում են աղի բլիթ՝ երազելով տեսնել իրենց երկրորդ կեսին։

- Միաժամանակ, այլուրով լի սինի են դնում տան մի անկյունում կամ դրսում՝ հույս ունենալով, որ Խդր Նավին և Խդր Էյլասը այդ գիշեր կանցնեն իրենց տան մոտով՝ իրենց ձիերի պայտի հետքը թողնելով այլուրի վրա։

- Տան մեծը տան մի անկյունում ալյուրով նշումներ է անում՝ դրանով խորհրդանշելով սուրբ հրեշտակների գալուստը։

- Գիշերը՝ լույսը դեռ չբացված տան բակում կրակ են անում՝ լուսավորելով սուրբ հրեշտակների գալստյան ճանապարհը։

- Երեխաները գուլպաներ են վերցնում և տնից տուն են գնում՝ նվերներ հավաքելով իրենց համար։ Դա կոչվում է «դոլիդանգ»։

Բուն տոնը նշվում է ուրբաթ։ Սեղաններ են պատրաստում տանը, մեկը մյուսի տուն գնում, նվերներ իրար բաժանում։

Թող Խդր Նավին և Խդր Էյլասը օրհնեն բոլորին, իրականացնեն բոլորի երազանքը և ամենակարևորը խաղաղություն բերեն Հայաստանին, Արցախին ու Շանգալին, նաև ամբողջ աշխարհին։