Գործող իշխանության օրոք պատերազմի օբյեկտիվ քննություն չի կարող լինել. ընդդիմադիր պատգամավորները չմասնակցեցին քննիչ հանձնաժողովի նիստին

Ազգային ժողովում այսօր կայացել է 44-օրյա պատերազմի հանգամանքներն ուսումնասիրող ԱԺ քննիչ հանձնաժողովի առաջին նիստը: Այսօրվա նիստի մեկնարկին ներկա էին «Հայաստան» խմբակցության պատգամավորներ Գեղամ Մանուկյանը և Գեղամ Նազարյանը, «Պատիվ ունեմ» խմբակցության պատգամավոր Տիգրան Աբրահամյանը: 

Ընդդիմադիրները կրկին պնդեցին՝ որ գործող իշխանության օրոք պատերազմի օբյեկտիվ քննություն չի կարող լինել.

«Իշխանությունը մի կողմից հայտարարում է, որ ստեղծված իրավիճակի պատասխանատուն և առաջին մեղավորն ինքն է, այս պայմաններում նրա մասնակցությամբ այս հանձնաժողովի աշխատանքների իրականացումը չի կարող օբյեկտիվ լինել: 44-օրյա պատերազմի հանգամանքների բացահայտումը և հանրությանը ներկայացնելը շարունակում է մնալ մեր առաջնահերթություններից մեկը, բայց մենք համարում ենք, որ այդ աշխատանքնմերը պետք է իրականացվեն այն ժամանակ, երբ գործող իշխանությունն այլևս չլինի իշխանության: Այն իշխանությունը, որն ունի պատասխանատվությունը, որի օրոք տեղի է ունցել այդ իրադարձությունները, նրա գլխավորությամբ իրականացվող աշխատանքը չի կարող ունենալ օբյեկտիվություն»,-ասաց Տիգրան Աբրահամյանը:

«Հայաստան» խմբակցությունից Գեղամ Մանուկյանն էլ նկատեց, որ օբյեկտիվ քննություն հնարավոր է, երբ քննիչ հանձնաժողովի մեծամասնությունը չի պատկանում այն քաղաքական ուժին, որի իշխանության օրոք սանձազերծվել է պատերազմ։

«Մենք հիմա լքում ենք դահլիճը և եթե մի օր նպատակահարմար գտնենք, կարող է գանք և մասնակցենք նիստին»,-նշեց Գեղամ Մանուկյանը, ընդդիմադիր պատգամավորները դուրս եկան նիստերի դահլիճից:

Հիշեցնենք, որ օրերս «Քաղաքացիական պայմանագիր» իշխող խմբակցության նախաձեռնությամբ է ստեղծվել այս հանձնաժողովը: Հանձնաժողովի լիազորությունները կիրականացնի Պաշտպանության եւ անվտանգության հարցերի մշտական հանձնաժողովը: Քննիչ հանձնաժողովի լիազորությունների  ժամկետը սահմանված է 6 ամիս:

«Հայաստան» և «Պատիվ ունեմ» խմբակցությունները հայտարարել են, որ չեն մասնակցի իշխանության ստեղծած քննիչ հանձնաժողովի աշխատանքներին՝ նշելով, որ իշխանությունները չեն կարող օբյեկտիվորեն քննել իրենց իսկ գործողությունները, և որ քննիչ հանձնաժողովն իշխանությունների «անմեղության» բեմադրությանն է լծված լինելու։