16 երկիր կոչ է արել քաղաքացիներին մեկ օրում լքել Ուկրաինան

Առնվազն 16 երկիր իրենց քաղաքացիներին խորհուրդ են տվել լքել Ուկրաինան՝ զգուշանալով պատերազմի սկսմամբ։ Միացյալ Նահանգները կոչ է արել դա անել 24-48 ժամվա ընթացքում։ Ռուսաստանի ներխուժումն Ուկրաինա, ըստ ԱՄՆ վարչակազմի, կարող է տեղի ունենալ ցանկացած պահի։ Ռազմական հարվածը հնարավոր է, այդ թվում՝ մինչև Պեկինում Օլիմպիական խաղերի ավարտը` մինչև փետրվարի 20-ը, ասել է ԱՄՆ-ի պետքարտուղար Էնթոնի Բլինքենը փետրվարի 11-ին Մելբուռն կատարած այցի ժամանակ, որտեղ նա հանդիպել է Ավստրալիայից, Հնդկաստանից և Ճապոնիայից ժամանած գործընկերների հետ, գրում է DW-ի ռուսական ծառայությունը։ 

Ավելի վաղ ԱՄՆ նախագահ Ջո Բայդենը Ուկրաինայում գտնվող ԱՄՆ քաղաքացիներին կոչ էր արել անհապաղ լքել երկիրը՝ Ռուսաստանի հետ պատերազմի սպառնալիքի պատճառով։ «Ամերիկայի քաղաքացիները պետք է անհապաղ հեռանան»,- ասել է Բայդենը NBC-ին տված հարցազրույցում։ 

«Մենք գործ ունենք ոչ թե ահաբեկչական կազմակերպության, այլ աշխարհի ամենամեծ բանակներից մեկի հետ: Սա այլ իրավիճակ է, և ամեն ինչ կարող է արագ դուրս գալ վերահսկողությունից»,- բացատրել է նա:

Հետևելով Բայդենի կոչին, մի շարք երկրների իշխանություններ խորհուրդ են տվել իրենց քաղաքացիներին անմիջապես լքել Ուկրաինան. այդ երկրներն են.

• Ավստրալիա,
• Մեծ Բրիտանիա,
• Հունաստան,
• Իսրայել,
• Կանադա,
• Լատվիա,
• Նիդեռլանդներ,
• Նոր Զելանդիա,
• Նորվեգիա,
• Հյուսիսային Մակեդոնիա,
• ԱՄՆ,
• Ֆինլանդիա,
• Մոնտենեգրո,
• Էստոնիա,
• Ճապոնիա,
• Հարավային Կորեա.

Միաժամանակ Բլինքենը ևս մեկ անգամ զգուշացրել է Ուկրաինայի դեմ ռուսական հնարավոր ռազմական ագրեսիայի լուրջ հետևանքների մասին։ Նրա խոսքով՝ Արևմուտքն արդեն ուրվագծել է կոշտ պատժամիջոցների ցանկը՝ ներառյալ տնտեսական և ֆինանսական միջոցները, արտահանման վերահսկողությունը, Ուկրաինային աջակցությունը և ՆԱՏՕ-ի հզորացումը։