կարևոր
1762 դիտում, 3 ամիս առաջ - 2022-02-11 21:21

Բայդենի կոչին են միացել նաև Ճապոնիայի, Հարավային Կորեայի և Նիդերլանդների իշխանությունները

Բայդենի կոչին են միացել նաև Ճապոնիայի, Հարավային Կորեայի և Նիդերլանդների իշխանությունները

ԱՄՆ նախագահ Ջո Բայդենը Ուկրաինայում գտնվող ԱՄՆ քաղաքացիներին կոչ է արել անհապաղ լքել երկիրը՝ Ռուսաստանի հետ պատերազմի սպառնալիքի պատճառով։ «Ամերիկայի քաղաքացիները պետք է անհապաղ հեռանան»,- ասել է Բայդենը NBC-ին տված հարցազրույցում։ «Մենք գործ ունենք ոչ թե ահաբեկչական կազմակերպության, այլ աշխարհի ամենամեծ բանակներից մեկի հետ: Սա այլ իրավիճակ է, և ամեն ինչ կարող է արագ դուրս գալ վերահսկողությունից»,- բացատրել է նա:

Այն բանից հետո, երբ ԱՄՆ նախագահ Ջո Բայդենը կոչ է արել ամերիկացիներին լքել Ուկրաինայի տարածքը, Ճապոնիայի, Հարավային Կորեայի և Նիդերլանդների իշխանությունները ուրբաթ՝ փետրվարի 11-ին, նույն առաջարկությամբ են հանդես եկել։

Ճապոնիայի ԱԳՆ-ն որոշել է առավելագույնը չորրորդի հասցնել Ուկրաինայի տարածքում գտնվելու սպառնալիքի մակարդակը և կոչ է արել իր քաղաքացիներին անհապաղ լքել երկիրը և հրաժարվել այն այցելելուց։

Գերատեսչությունում այս որոշումը բացատրել են «ուկրաինա-ռուսական սահմանին լարվածության շարունակական աճով»։ Ճապոնիան նաև հայտարարել է, որ «ապագայում չի բացառվում կոմերցիոն թռիչքների դադարեցումը» Ճապոնիայի և Ուկրաինայի միջև։

Նման որոշում են կայացրել նաև Հարավային Կորեայի և Նիդերլանդների իշխանությունները։

Նշենք, որ նախօրեին ՌԴ ԱԳ նախարար Սերգեյ Լավրովը խորհուրդ էր տվել Ուկրաինայում ՌԴ դիվանագիտական ​​առաքելության ոչ հիմնական անձնակազմին որոշ ժամանակով լքել երկիրը։