կարևոր
1831 դիտում, 3 ամիս առաջ - 2022-02-07 22:26

Բայրաքթարների արտադրությունը կսկսվի նաև Ադրբեջանում

Բայրաքթարների արտադրությունը կսկսվի նաև Ադրբեջանում

Թուրքական անօդաչու թռչող սարքեր արտադրող «Baykar» ընկերությունը նախատեսում է ԱԹՍ-ների արտադրություն հիմնել Ադրբեջանում։ Ինչպես հայտնում է ՌԻԱ Նովոստին, այդ մասին հայտարարել է ձեռնարկության տեխնիկական տնօրեն, Թուրքիայի նախագահ Ռեջեփ Թայիփ Էրդողանի փեսա Սելջուկ Բայրաքթարը։

Ադրբեջանական ԱԹՍ–ները կթողարկվեն ոչ թե «Բայրաքթար», այլ «Աքինջի» անվանումով։

«Ադրբեջանի համապատասխան կառույցները հետաքրքրված են «Աքինջի» անօդաչու թռչող սարքով: «Baykar» ընկերությունը ցանկանում է աշխատել Ադրբեջանում այդ տեխնոլոգիայի զարգացման ուղղությամբ: Մենք նախաձեռնելու ենք ինչպես դրա մշակումը, այնպես էլ արտադրությունը Ադրբեջանում»,- ասել է Բայրաքթարը ադրբեջանական պետական AzTV հեռուստաալիքին տված հարցազրույցում։

Նրա խոսքով` այդ աշխատանքում կներգրավվեն ոլորտի հետ կապված ադրբեջանցի մասնագետները։ 

Հավելենք, որ փետրվարի 3-ին էլ Կիևում կայացած Էրդողան-Զելենսկի հանդիպումից հետո Զելենսկին հայտարարեց, որ Ուկրաինան եւ Թուրքիան համաձայնագիր են ստորագրել բարձր ռազմական տեխնոլոգիաների ոլորտում, որի շրջանակներում Ուկրաինայում կկառուցեն «Բայրաքթար» անօդաչու սարքերի արտադրության գործարան: Բացի այդ, նախատեսվում է ստեղծել ուսումնական կենտրոն, որը օդաչուներին կսովորեցնի կառավարել տարբեր կատեգորիաների դրոններ։

Հիշեցնենք, որ Արցախի դեմ սանձազերծած 44-օրյա պատերազմի ժամանակ Ադրբեջանն ինտենսիվորեն օգտագործում էր Բայրաքթար անօդաչու սարքերը:

Լուսնակարում՝ պատերազմի ժամանակ հայկական զինված ուժերի կողմից ոչնչացված ադրբեջանական անօդաչու թռչող Բայրաքթար մոդելի սարքն է: