կարևոր
1327 դիտում, 4 ամիս առաջ - 2022-02-05 10:55

ԱԳՆ-ն հերքում է Թուրքիայի փոխնախագահին. Փաշինյանի այց Թուրքիա չի քննարկվում

ԱԳՆ-ն հերքում է Թուրքիայի փոխնախագահին. Փաշինյանի այց Թուրքիա չի քննարկվում

Նիկոլ Փաշինյանի այց Թուրքիա և մասնակցություն Անթալիայի դիվանագիտական համաժողովին չի քննարկվում, ֆեյսբուքի էջում գրել է ԱԳՆ խոսնակ Վահան Հունանյանը։

Նշենք, որ երեկ A Haber- ին տված  հարցազրույցում Թուրքիայի փոխնախագահ Ֆուաթ Օքթայը հայտնել է, որ Հայաստանի վարչապետը հայտարարել է Անթալիայի դիվանագիտական ֆորումին մասնակցելու համաձայնության մասին: Հարցազրույցից հետո թուրքական ԶԼՄ-երը արագորեն տարածեցին լուրը՝ «Փաշինյանը մարտին գալիս է Թուրքիա» գլխագրով:

Նշենք, որ Նիկոլ Փաշինյանն իր ասուլիսին հայտարարել էր, թե հավանականությունը մեծ է, որ Հայաստանը կընդունի Անթալիայի ֆորումին մասնակցելու Թուրքիայի հրավերը։

Ավելի վաղ ՀՀ արտգործնախարարությունը հայտնել էր, որ նախարար Արարատ Միրզոյանը ստացել և շարունակում է ստանալ այս տարվա ընթացքում տարատեսակ միջոցառումների, այդ թվում՝ Անթալիայի դիվանագիտական ֆորումին մասնակցության հրավերներ։ «ՀՀ ԱԳ նախարարությունը համապատասխան ընթացակարգով քննարկում է նախարարի՝ վերոնշյալ միջոցառումներին մասնակցության նպատակահարմարությունը։ Հանրությունը պատշաճ կերպով կտեղեկացվի կայացվելիք որոշումների մասին»,- նշել էր Հունանյանը։

Իսկ փետրվարի 2-ին Արարատ Միրզոյանը մամուլի ասուլիսի ժամանակ հայտնել է, որ դեռևս քննարկվում է Անթալիա մեկնելու հարցը և հավելել.

«Ես այդտեղ ոչ միայն խնդիր չեմ տեսնի, այլև, կարծում եմ, որ, նույնիսկ եթե այն շաղկապենք Հայաստան-Թուրքիա երկխոսության հետ, դրական երանգներ հաղորդելուց բացի այլ բան չունի»:

Նշենք, որ Անթալիայի, այսպես կոչված, դիվանագիտական ֆորումը բացառապես թուրքական պրոեկտ է, որը հիմնադրվել է Էրդողանի կողմից։ Այդ ֆորումի առաջին հավաքը տեղի է ունեցել անցյալ տարի: Մասնակիցների ճնշող մեծամասնությունը թուրքալեզու պետությունների կազմակերպության պետությունների ներկայացուցիչներ էին և/կամ եվրոպական և ամերիկյան ինչ-որ ժամանակի դիվանագետներ, որոնք անթաքույց թուրքական լոբբիի ներկայացուցիչներ են։ Օրինակ, անցյալ տարվա Ֆորումին մասնակցել է տխրահռչակ Մեթյու Բրայզան, որը 44-օրյա պատերազմի ընթացքում և հետո զբաղված էր Թուրքիայի շահերի պաշտպանությամբ։ Ֆորումի մասնակիցների՝ թե՛ անցյալ տարվա, թե՛ այս տարվա ճնշող մեծամասնությունը մեծ բերկրանք է ապրել 44-օրյա պատերազմի արդյունքներով, պաշտոնական շնորհավորանքներ հղել Ալիևին։ Ֆորումը նախաձեռնել և ստեղծել է անձմաբ Էրդողանը։ Ֆորումն ամեն ինչ կարելի է անվանել, բայց ոչ՝ միջազգային. այն մաքուր պրոթուրքական և միջթուրքական ֆորում է: