կարևոր
1507 դիտում, 3 ամիս առաջ - 2022-02-04 19:56

Ռոբերտ Քոչարյանը ցավակցագիր է հղել Արթուր Գրիգորյանի հարազատներին

Ռոբերտ Քոչարյանը ցավակցագիր է հղել Արթուր Գրիգորյանի հարազատներին

ՀՀ երկրորդ նախագահ Ռոբերտ Քոչարյանը ցավակցել է Արթուր Գրիգորյանի ընտանիքին, հարազատներին.

«Խորը ցավով տեղեկացա ՀՀ ժողովրդական արտիստ, կոմպոզիտոր Արթուր Գրիգորյանի մահվան մասին։

Մեծ է Արթուր Գրիգորյանի ավանդը ժամանակակից հայ երգարվեստի զարգացման ու տարածման մեջ։ Իր ստեղծած և ղեկավարած Երգի պետական թատրոնով, իր պատրաստած մասնագետներով, իր հեղինակած ստեղծագործություններով Արթուր Գրիգորյանը, անկասկած, մեծ դեր է խաղացել հայ մշակույթի մեջ։

Ջերմությամբ եմ հիշում Արթուր Գրիգորյանի հետ մեր հանդիպումները:

Ցավակցություն եմ հայտնում Արթուր Գրիգորյանի ընտանիքին, հարազատներին, նրա դարբնոցով անցած հարյուրավոր արտիստներին և նրա բազմահազար երկրպագուներին»,- ասված է Ռոբերտ Քոչարյանի ցավակցագրում:

Այսօր երկարատև հիվանդությունից հետո, հիվանդանոցում 64 տարեկանում մահացել է կոմպոզիտոր, ՀՀ ժողովրդական արտիստ Արթուր Գրիգորյանը։ ՀՀ ԿԳՄՍ նախարարությունից հայտնել են, որ Արթուր Գրիգորյանի հոգեհանգստի և հուղարկավորության արարողությունների կապակցությամբ կձևավորվի կառավարական հանձնաժողով: