կարևոր
1318 դիտում, 3 ամիս առաջ - 2022-02-04 16:29

Բուհերի քաղաքականացման գործընթացը շարունակվում է. երիտասարդ փոխվարչապետը ևս Հոգաբարձուների խորհրդի նախագահ ընտրվեց

Բուհերի քաղաքականացման գործընթացը շարունակվում է. երիտասարդ փոխվարչապետը ևս Հոգաբարձուների խորհրդի նախագահ ընտրվեց

Այսօր փետրվարի 4-ին տեղի է ունեցավ «Վ. Բրյուսովի անվան պետական համալսարան» հիմնադրամի հոգաբարձուների խորհրդի նիստը։ Օրակարգային առաջին երկու հարցերը վերաբերում էին Խորհրդի նախագահի և քարտուղարի ընտրությանը։

Միաձայն «կողմ» քվեարկությամբ Խորհրդի նախագահ ընտրվեց ՀՀ փոխվարչապետ Համբարձում Մաթևոսյանը, իսկ քարտուղար՝ Համալսարանի գիտական քարտուղար Հասմիկ Փիլավջյանը:

29-ամյա Համբարձում Մաթևոսյանը 2021 թվականի նոյեմբերին է նշանակվել փոխվարչապետ՝ փոխարինելով Սուրեն Պապիկյանին: Մինչ այդ նա Արմավիրի մարզպետն էր 2018 թվականի հոկտեմբերի 16-ից: 

Ծնվել է 1992թ-ի նոյեմբերի 18-ին Գյումրիում: 2009-2012 թվականներին սովորել ԱՄՆ Կալիֆորնիա նահանգի Գրոսմոնտ քոլեջի «Համաշխարհային գիտություններ» բաժնում։ 2012-2015 թվականներին սովորել է ԱՄՆ Կալիֆորնիա նահանգի Սան Դիեգոյի պետական համալսարանում:

2013-2014 թվականներին աշխատել է Ուկրաինայի Դոնեցկ քաղաքի «Կերամռեսուրս» ՍՊԸ-ում՝ որպես եվրոպական շուկայի պատասխանատու։ 2013-2015 թվականներին աշխատել է Ուկրաինայի Դոնեցկ քաղաքում՝ որպես Հայաստանի պատվավոր հյուպատոսի խորհրդական։

2016-2018 թվականներին աշխատել է Հայաստանի ամերիկյան համալսարանում՝ որպես հումանիտար և հասարակական գիտությունների ֆակուլտետի կառավարիչ, ընդհանուր կրթության գծով խորհրդական։

Անդրադառնալով հանրության որոշ շրջանակում առկա մտահոգություններին՝ Խորհրդում քաղաքական պաշտոն զբաղեցնող անձի ներգրավվածության վերաբերյալ, Համբարձում Մաթևոսյանը նշեց, որ այն պայմանավորված է գործող իրավակարգավորումներով, և, մինչև ոլորտը կարգավորող նոր օրենքի ընդունումը, որից հետո կբացառվի Կառավարման խորհրդում քաղաքական պաշտոն զբաղեցնող անձի ներգրավվածությունը, հավաստիացրեց՝ ինքն առաջին երաշխավորն է լինելու, որպեսզի Համալսարանի գործունեությունը լինի ապաքաղաքական։

Հիշեցնենք, հունվարի 21-ին Հայաստանի ազգային պոլիտեխնիկական համալսարանի Հոգաբարձուների խորհրդի նախագահ ընտրվեց նախկին փոխվարչապետ, «Քաղաքացիական պայմանագիր» կուսակցության վարչության անդամ Տիգրան Ավինյանը:

Երևանի պետական համալսարանի հոգաբարձուների խորհրդի նախագահն էլ նոյեմբերին ընտրվել է նույն «Քաղաքացիական պայմանագիր» կուսակցության վարչության անդամ, այն ժամանակ փոխվարչապետ, այժմ Պաշտպանության նախարար Սուրեն Պապիկյանը: Իսկ ԵՊՀ ռեկտոր ընտրվեց միակ թեկնածու ՔՊ-ական նախկին պատգամավոր Հովհաննես Հովհաննիսյանը: