Մոնթեին վերաբերող նյութերի արգելափակման հարցով Մարդու իրավունքների պաշտպանը դիմել է ֆեյսբուքին

Հայաստանի ազգային հերոս, Արցախի հերոս Մոնթե Մելքոնյանի նկարների և նրա վերաբերյալ գրառումների հրապարակումից հետո «Ֆեյսբուք» սոցիալական ցանցի օգտատերերի էջերի նկատմամբ կիրառվող արգելափակումների հետ կապված ՀՀ մարդու իրավունքների պաշտպանը նամակ է ուղղել «Ֆեյսբուք»-ին։ Այս մասին հաղորդում է ՀՀ ՄԻՊ աշխատակազմը:

«Հատուկ շեշտադրվել է, որ «Ֆեյսբուք»-ի այս քաղաքականությունը վնասում է սոցիալական մեդիայում խոսքի ազատությանը, առավել ևս այն պարագայում, երբ Մոնթեն մեր ժողովրդի համար հայրենասիրության և առաքինության, անձնուրացության օրինակ է համարվում:

Պաշտպանի աշխատակազմում ուսումնասիրվել և «Ֆեյսբուք»-ին է ներկայացվել փաստեր, որ Մոնթեի մասին խոսվում է դպրոցական ու բուհական դասագրքերում:

Կից ներկայացրել ենք ապացույցներ արգելափակված կամ սահմանափակումների ներքո գտնվող օգտահաշիվների կամ էջերի վերաբերյալ»,- ասված է ՄԻՊ աշխատակազմի տարածած հաղորդագրության մեջ:

Հավելենք նաև, որ Մոնթեի լուսանկարի և նրա մասին հրապարակումների պատճառով Երկիր Մեդիայի ֆեսյբուքյան էջը նույնպես մեկ ամսից ավել ենթարկվել է ֆեյսբուքյան գրաքննության: Էջը խիստ սահմանափակումների տակ է այժմ: Մեր խմբագրակազմը վերահստատում է՝ Մարտունու շրջանի ինքնապաշտպանական ուժերի հրամանատար Մոնթե Մելքոնյանը Հայաստանի և Արցախի ազգային հերոս է: