կարևոր
1819 դիտում, 3 ամիս առաջ - 2022-01-25 20:01

Նախագահի հրաժարականի բուն պատճառները հստակ և ամբողջական ներկայացված են հայտարարության տեքստում. պարզաբանում

Նախագահի հրաժարականի բուն պատճառները հստակ և ամբողջական ներկայացված են հայտարարության տեքստում. պարզաբանում

Հանրապետության նախագահի հրաժարականի հայտարարությամբ Արմեն Սարգսյանը հանրության ուշադրությունը հրավիրեց պետության առջև ծառացած իրական խնդիրների և մարտահրավերների վրա, բնութագրելով երկրում ստեղծված իրավիճակը որպես համազգային ճգնաժամ: Այս մասին ասվում է Հանրապետության նախագահի աշխատակազմի տարածած հայտարարության մեջ։

«Ցավոք, «Հետք»-ի և նմանատիպ հրապարակումներով փորձ է կատարվում հանրության ուշադրությունը կրկին շեղել կեղծ օրակարգով: Ուստի մեկ անգամ ևս վերահաստատում ենք, որ պահի գնահատականը և նախագահի հրաժարականի բուն պատճառները հստակ և ամբողջական ներկայացված են հրաժարականի հայտարարության տեքստում»,- նշվում է հայտարարության մեջ:

Հիշեցնենք, որ Արմեն Սարգսյանը նախագահի պաշտոնից հրաժարվելու մասին հայտարարությունը տարածել է հունվարի 23-ին։ Այնուհետ «Հետք» լրատվականը հրապարակել էր նյութ, որտեղ նշվում է, որ նախագահ Արմեն Սարգսյանի հրաժարականի պատճառը մեկն է՝ նա այլ երկրի քաղաքացի էր առնվազն մինչեւ նախագահ դառնալը: ՀՀ դատախազությունից այսօր հայտնել են, որ հրապարակումն ԱԱԾ է փոխանցվել՝ նկատի ունենալով, որ Սարգսյանի երկքաղաքացիության փաստը թաքցնելու դեպքի առթիվ դեռևս 2021 թ. ապրիլին հարուցվել է քրեական գործ՝ փաստաթղթեր կեղծելու հատկանիշներով: Հրապարակումը հենց այս գործի շրջանակում կդառնա ստուգման առարկա: