կարևոր
1045 դիտում, 3 ամիս առաջ - 2022-01-24 17:05

Խորհրդարանական մեծամասնության քվեարկությամբ Մարդու իրավունքների պաշտպանն ընտրվեց

Խորհրդարանական մեծամասնության քվեարկությամբ Մարդու իրավունքների պաշտպանն ընտրվեց

ՀՀ Ազգային ժողովն այսօր փակ գաղտնի քվեարկությամբ ՀՀ մարդու իրավունքների պաշտպան ընտրեց իշխող «Քաղաքացիական պայմանագիր» խմբակցության առաջադրած թեկնածու Քրիստիննե Գրիգորյանին։ ԱԺ 107 պատգամավորից քվեարկությանը մասնակցել է 68 պատգամավոր, որոնք բոլորն էլ կողմ են քվեարկել: «Հայաստան» եւ «Պատիվ ունեմ» խմբակցությունների պատգամավորները չմասնակցեցին քվեարկությանը:

Քվեարկության արդյունքների հրապարակումից հետո Մարդու իրավունքների նոր պաշտպանը մոտեցավ խորհրդարանի ամբիոնին եւ երդում տվեց: Նոր պաշտոնը նա կստանձնի փետրվարի 23-ից հետո, երբ կլրանա գործող պաշտպան Արման Թաթոյանի պաշտոնավարման ժամկետը։ Արման Թաթոյանը մարդու իրավունքների պաշտպանի պաշտոնում է 2016թ.-ից։ ՄԻՊ-ն ընտրվում է ԱԺ պատգամավորների ընդհանուր թվի ձայների առնվազն 3/5 -ով՝ 6 տարի ժամկետով։

Քրիստինե Գրիգորյանը ՄԻՊ է ընտրվել ևս 6 տարի ժամկետով։ Մարդու իրավունքների պաշտպանի վրա տարածվում է պատգամավորի համար սահմանված անձեռնմխելիության իրավունքը և անհամատեղելիության պահանջները: ՀՀ ՄԻՊ ինստիտուտի գոյության ընթացքում սա երկրորդ անգամ է, որ այդ պաշտոնը կին է զբաղեցնելու։ Առաջինը եղել է Հայաստանի մարդու իրավունքների առաջին պաշտպան Լարիսա Ալավերդյանը (2004-2006 թթ)։

Քրիստինե Գրիգորյանը 41 տարեկան է, ունի երկու բարձրագույն կրթություն` իրավագիտություն և արևելագիտություն մասնագիտությամբ: Հիմնականում աշխատել է պետական մարմիններում՝ ԱԺ աշխատակազմ, ՀՀ արդարադատության նախարարություն, առաջին փոխվարչապետի աշխատակազմ: 2014-15թթ-ին նա աշխատել է ԱՄՆ ՄԶԾ «Աջակցություն Հայաստանի ԱԺ-ի ինստիտուցիոնալ կարողությունների ծրագրում: Իսկ 2021թ-ի ապրիլից Քրիստինե Գրիգորյանը զբաղեցնում էր արդարադատության նախարարի տեղակալի պաշտոնը: