կարևոր
1081 դիտում, 3 ամիս առաջ - 2022-01-20 12:41

Եվս մեկ անգամ փաստվեց, որ Արմեն Չարչյանին կալանքի տակ պահելը եղել է ապօրինի. պաշտպան

Եվս մեկ անգամ փաստվեց, որ Արմեն Չարչյանին կալանքի տակ պահելը եղել է ապօրինի. պաշտպան

Հայաստան խմբակցության պատգամավոր Արմեն Չարչյանի պաշտպան Էրիկ Ալեքսանյանը հայտնում է, որ քիչ առաջ ստացվել է Արմեն Չարչյանի գործով մինչգերատեսչական հանձնաժողովային փորձաքննության եզրակացության պատճենն, ըստ որի՝ Արմեն Չարչյանի մոտ փորձաքննության ընթացքում իրականացված հետազոտություններով պարզված ախտորոշումը համապատասխանում է ՀՀ կառավարության 2006 թվականի մայիսի 26-ի թիվ 825-Ն որոշման՝ «Որպես խափանման միջոց ընտրված կալանքը կամ պատիժը կրելուն խոչընդոտող ծանր հիվանդությունների շարքին եւ այդպիսով խոչընդոտում է նրա որպես խափանման միջոց ընտրված կալանքի համար»:

«Հարգելի հայրենակիցներ, վերը նշվածով եւս մեկ անգամ փաստվեց, որ Արմեն Չարչյանին 2021 թվականի հունիսի 23-ից մինչեւ 2021 թվականի դեկտեմբերի 10-ը կալանքի տակ պահելն եղել է ապօրինի»,- գրում է Էրիկ Ալեքսանյանը։

Հիշեցնենք, որ 5 ամսից ավել գտնվելով կալանավայրում՝ պորֆեսորի առողջական վիճակը վատթարացել էր. որոշ ժամանակ նա գտնվում էր հիվանդանոցում, դատարանն էլ փորձագիտական հանձնաժողով պետք է ձևավորեր, որպեսզի Արմեն Չարչյանի առողջական վիճակը գնահատվեր և կալանքի հետ անհամատեղելի համարվեր: 

2021թ.-ի դեկտեմբերի 9-ին Սահմանադրական դատարանը հրապարակեց պատգամավորների անձեռնմխելիության վերաբերյալ որոշումը: Սահմանադրական դատարանը, ըստ էության, արձանագրեց, որ անազատության մեջ գտնվող պատգամավորի կարգավիճակ չունեցող անձը պատգամավորի կարգավիճակ ձեռք բերելու պահից չի կարող պահվել անազատության մեջ: Սահմանադրական դատարանի այս որոշումից հետո դատարանը որոշմամբ ազատ արձակվեց Արմեն Չարչյանը՝ նրա նկատմամբ խափանման միջոց կիրառելով ստորագրությամբ չհեռանալը: