կարևոր
268 դիտում, 5 օր առաջ - 2022-01-13 19:15

ՀԱՊԿ-ի պաշտպանության նախարարները ստորագրել են Ղազախստանից խաղաղապահների վերադարձի մասին որոշումը

ՀԱՊԿ-ի պաշտպանության նախարարները ստորագրել են Ղազախստանից խաղաղապահների վերադարձի մասին որոշումը

Հունվարի 13-ին տեսակապի միջոցով կայացել է Հավաքական անվտանգության պայմանագրի կազմակերպության պաշտպանության նախարարների խորհրդի արտահերթ նիստը։ 

ՀՀ պաշտպանության նախարարությունը հայտնում է, որ նիստը վարել է ՀԱՊԿ պաշտպանության նախարարների խորհրդի նախագահ, ՀՀ պաշտպանության նախարար Սուրեն Պապիկյանը, մասնակցել են ՌԴ պաշտպանության նախարար, բանակի գեներալ Սերգեյ Շոյգուն, Բելառուսի պաշտպանության նախարար, գեներալ-լեյտենանտ Վիկտոր Խրենինը, Ղազախստանի պաշտպանության նախարար, գեներալ-լեյտենանտ Մուրատ Բեկտանովը, Ղրղզստանի պաշտպանության նախարար, գեներալ-մայոր Բակտիբեկ Բեկբոլոտովը, Տաջիկստանի պաշտպանության նախարար, գեներալ-գնդապետ Շերալի Միրզոն, ՀԱՊԿ Միացյալ շտաբի պետ, գեներալ-գնդապետ Անատոլի Սիդորովը, ՀԱՊԿ գլխավոր քարտուղարի տեղակալ Թախիր Խայրուլոևը և Ղազախստանի Հանրապետությունում ՀԱՊԿ Հավաքական խաղաղապահ ուժերի հրամանատար, գեներալ-գնդապետ Անդրեյ Սերդյուկովը։

«ՀԱՊԿ անդամ երկրների պաշտպանության նախարարները նիստի ընթացքում քննարկել են Ղազախստանի Հանրապետությունում խաղաղապահ գործողության արդյունքները, ինչպես նաև տարածաշրջանային անվտանգության ապահովման և առաջացող սպառնալիքներին արագ արձագանքման մեխանիզմների կատարելագործման հարցեր։

ՀԱՊԿ պաշտպանության նախարարների խորհրդի արտահերթ նիստի արդյունքներով՝ պաշտպանական գերատեսչությունների ղեկավարները ստորագրել են «Ղազախստանի Հանրապետության տարածքից ՀԱՊԿ անդամ երկրների խաղաղապահ ստորաբաժանումների վերադարձը մշտական տեղակայման վայրեր կազմակերպելու մասին» ՀԱՊԿ պաշտպանության նախարարների խորհրդի համատեղ որոշումը»,- նշված է հաղորդագրությունում:

Ավելի վաղ հայտարարվել էր, որ իրավիճակը Ղազախստանում կայունացել է, և ՀԱՊԿ խաղաղապահ ուժերի դուրսբերումը կմեկնարկի հունվարի 13-ից: 

Խաղաղապահների վերադարձը, որը սկսվել է հինգշաբթի, կավարտվի հունվարի 19-ին, նախագահ Վլադիմիր Պուտինի հետ հանդիպմանը հայտարարել է ՌԴ պաշտպանության նախարար Սերգեյ Շոյգուն։

«Մենք հաստատել ենք զինվորականների փուլային դուրսբերման և Ղազախստանին պաշտպանության տակ գտնվող օբյեկտների տեղափոխման մասին որոշումը»,- ասել է Շոյգուն։ 

Նա հավելել է, որ վաղը 14 ինքնաթիռով Ղազախստանից դուրս կբերվեն Հայաստանի, Տաջիկստանի և Բելառուսի խաղաղապահները։

Ընդհանուր առմամբ Ղազախստանում իրենց առաքելությունն են իրականացրել ավելի քան երկու հազար խաղաղապահ զորքեր Ռուսաստանից, Հայաստանից, Բելառուսից, Ղրղզստանից և Տաջիկստանից: