կարևոր
2068 դիտում, 5 օր առաջ - 2022-01-13 14:55

«Ապրելու երկիր»-ը դիմելու է դատարան՝ կառավարության անգործության հիմքով

«Ապրելու երկիր»-ը դիմելու է դատարան՝ կառավարության անգործության հիմքով

Ապրելու երկիր» խմբակցությունը, դիմել է ՀՀ կառավարությանը Փարաքար համայնքի ավագանու լիազորությունները վաղաժամկետ դադարեցնելու և նոր ընտրություններ նշանակելու խնդրանքով՝ հիմք ընդունելով «Տեղական ինքնակառավարման մասին» օրենքի 69-րդ հոդվածի 2-րդ մասը։ 

Կուսակցության տարածած հաղորդագրության մեջ նշված է. ««Ապրելու երկիր» խմբակցությունը, 03․01․2022թ․ դիմել է ՀՀ կառավարությանը Փարաքար համայնքի ավագանու լիազորությունները վաղաժամկետ դադարեցնելու և նոր ընտրություններ նշանակելու խնդրանքով՝ հիմք ընդունելով «Տեղական ինքնակառավարման մասին» օրենքի 69-րդ հոդվածի 2-րդ մասը։ Օրենքով սահմանված երկշաբաթյա ժամկետը լրացել է 2022թ հունվարի 3-ին։

Նույնանման հանգամանքներով մեկ այլ՝ Վեդի համայնքի դեպքում ՀՀ կառավարության 2022թ հունվարի 4-ի որոշմամբ վաղաժամկետ դադարեցվել են Արարատի մարզի Վեդի համայնքի ավագանու լիազորությունները  և նշանակվել են ավագանու արտահերթ ընտրություններ։ Ընդ որում, հունվարի 4-ին ՀՀ կառավարությունը այդ որոշումը կայացրել է հեռակա քվեարկությամբ՝ չսպասելով հունվարի 5-ի հերթական նիստին՝ նպատակ ունենալով պահպանել օրենքով սահմանված ժամկետները։

2021թ․ դեկտեմբերի 20-ին տեղի է ունեցել ՀՀ Արմավիրի մարզի Փարաքար համայնքի ավագանու առաջին նիստը, և համայնքի ղեկավար է «ընտրվել» հունվարի 9-ի նիստին՝ 21-րդ օրը՝ օրենքի կոպիտ խախտումներով։ Այս փաստը հիմք է ՀՀ կառավարության կողմից օրենքի ուժով ՀՀ Արմավիրի մարզի Փարաքար միավորված համայնքի ավագանու լիազորությունները վաղաժամկետ դադարեցնելու և ավագանու արտահերթ ընտրություններ նշանակելու համար։ Սակայն, ՀՀ կառավարությունը նման որոշում չի կայացրել ոչ միայն սեփական նախաձեռնությամբ, այլև «Ապրելու երկիր» խմբակցության կողմից 2022թ հունվարի 3-ի և հունվարի 5-ի ներկայացված դիմումների հիման վրա։ Ավելին, կառավարությունը մինչև այժմ չի պատասխանել խմբակցության նամակին՝ սպասելով քաղաքական որոշման։

Այս կապակցությամբ, «Ապրելու երկիր» խմբակցությունը դիմելու է դատարան՝ կառավարության անգործության հիմքով և կառավարության կողմից իր պարտականությունների կատարման պահանջով։

«Ապրելու երկիր» կուսակցությունը Փարաքար համայնքում հավաքել է ձայների 49%-ը, «Քաղաքացիական պայմանագիր» կուսակցությունը՝ 27%: Համայնքի ութ բնակավայրերից երեքում «Ապրելու երկիր» կուսակցությունը հավաքել է 77-85% ձայներ»։

Հիշեցնենք, որ  հունվարի 9-ին կայացավ Փարաքար համայնքի ավագանու նիստը: Նախ «Ապրելու երկիր» խմբակցության անդամները վայր դրեցին մանդատները եւ լքեցին նիստերի դահլիճը: «Դավիթ Մինասյան դաշինքին աջակցություն հայտնեց ՔՊ-ն, և 11 կողմ ձայնով համայնքապետ ընտրեցին Դավիթ Մինասյանին: Հայտարարվեց, որ առաջիկա 5 տարին «Դավիթ Մինասյան» դաշինքը և ՔՊ-ն համատեղ կկառավարեն համայնքը, համապատասխանաբար դաշինքի առաջնորդ Դավիթ Մինասյանը և ՔՊ թեկնածու Լյուդվիգ Գյուլնազարյանը համամասնորեն կկիսեն համայնքի կառավարումը: 

«Ապրելու երկիր» կուսակցությունը հայտարարեց, որ դիմելու է դատարան՝ վիճարկելու Փարաքարում հունվարի 9-ին տեղի ունեցած ավագանու նիստի իրավազորությունը: