կարևոր
1240 դիտում, 4 ամիս առաջ - 2022-01-05 16:35

Ղազախստանի մայրաքաղաքում ևս արտակարգ դրություն և պարետային ժամ է հայտարարվել

Ղազախստանի մայրաքաղաքում ևս արտակարգ դրություն և պարետային ժամ է հայտարարվել

Ղազախստանի նախագահ Կասիմ-Ժոմարտ Տոկաևը այսօր երկրում տեղի ունեցած բողոքի ցույցերի ֆոնին Նուր-Սուլթանում արտակարգ դրություն է մտցրել հունվարի 5-ից 19-ը, համապատասխան հրամանագիրը հրապարակվել է հանրապետության ղեկավարի կայքում։

«Քաղաքացիների անվտանգությանը սպառնացող լուրջ և անմիջական սպառնալիքի հետ կապված՝ հասարակական անվտանգությունն ապահովելու, օրինականությունն ու կարգը վերականգնելու, քաղաքացիների իրավունքներն ու ազատությունները պաշտպանելու, Նուր-Սուլթան քաղաքում արտակարգ դրություն մտցնելու համար սկսած՝ 2022 թվականի հունվարի 5-ին ժամը 16:00-ին՝ մինչև 2022 թվականի հունվարի 19-ի ժամը 00 ժամ 00 րոպե ժամկետով»,- ասված է հրամանագրում։

Բացի այդ, իշխանությունները պարետային ժամ են մտցրել, որը գործելու է ժամը 23.00-ից մինչև 07.00-ն։ Հրամանագրի գործողության ընթացքում սահմանափակվում է նաև քաղաքից մուտքն ու ելքը, ֆիզիկական անձանցից ժամանակավորապես կառգրավվեն զենք-զինամթերք։ Համաձայն հրամանագրի՝ արգելվում է խաղաղ հավաքներ, ժամանցային, սպորտային և զանգվածային այլ միջոցառումներ, ինչպես նաև գործադուլներ կազմակերպել և անցկացնել։

Ավելի վաղ արտակարգ դրություն էր մտցվել Ալմաթիի և Մանգիստաուի շրջաններում։ 

Ղազախստանում բողոքի ակցիաները սկսվել են նոր տարվա առաջին օրերին։ Ժանաոզեն և Ակտաու քաղաքների բնակիչները դուրս են եկել ցույցերի՝ բողոքելով հեղուկ գազի գնի կրկնակի թանկացման դեմ։ Այսօր արդեն դրանք վերածվել են զանգվածային անկարգությունների հանրապետության գրեթե ամբողջ տարածքում: Ցուցարարները գրավել են Ղազախստանի նախագահի՝ Ալմաթիում գտնվող նստավայրը։