կարևոր
1765 դիտում, 4 շաբաթ առաջ - 2021-12-23 13:11

Փարաքարում համայնքապետի յուրահատուկ երդմնակալություն է

Փարաքարում համայնքապետի յուրահատուկ երդմնակալություն է

Այսօր Փարաքարի համայնքապետի երդմնակալության օրն է: Սակայն համայնքում պատերազմական վիճակ է՝ միանգամից 2 անձ իրեն համարում է ընտրված համայնքապետ՝ «Ապրելու երկիր» կուսակցության եւ «Դավիթ Մինասյան» դաշինքի առաջին համարները։

Այսօր վաղ առավոտից Փարաքար համայնքում ոստիկանությունը փակել է համայնքապետարանի մուտքը: «Ապրելու երկիր» կուսակցությունը, որը համարում է, որ իր թեկնածու Վոլոդյա Գրիգորյանն ընտրվել է համայնքապետ, Մշակույթի տան դիմաց ամբիոն է տեղադրել եւ կազմակերպել երդմնակալության արարողությունը: Վոլոդյա Գրիգորյանը իր աջակիցների դիմաց ընթերցեց համայնքապետի լիազորությունների ստանձնման երդման տեքստը:

Համայնքապետարանի շենքը, սակայն շղթայված է ոստիկաններով, և Վոլոդյա Գրիգորյանին թույլ չեն տալիս ներս մտնել: Ոստիկանության ներկայացուցիչը նշել է, որ ժամանակավորապես սահմանափակվել է անձանց մուտքը, իսկ պատճառներն իմանալու համար խնդրեց գրավոր դիմել ոստիկանություն:

Նշենք, որ համայնքապետի երդմնակալության արարողությունը պետք է իրականացվի ընտրված ավագանու անդամների մասնակցությամբ: 

Փարաքար խոշորացված համայնքում անցկացված ընտրությունների արդյունքում 10 մանդատ ստացել է «Ապրելու երկիր» կուսակցությունը, 9 մանդատ ստացել է «Դավիթ Մինասյան» կուսակցությունների դաշինքը, իսկ 2-ը՝ «Քաղաքացիական պայմանագիրը»։

Նախ համայնքապետի պաշտոնի համար առաջադրվել է «Ապրելու երկիր» կուսակցության թեկնածու Վոլոդյա Գրիգորյանը, օրն ընտրվել է 10 ձայնով: Ըստ «Ապրելու երկրի» պարզաբանման,  օրենքը թույլատրում է  40 %-ով ընտրել համայնքապետի համար առաջադրված միակ թեկնածուին։ Դրանից հետո եկել են Դավիթ Մանուկյանի թեկնածությունը պաշտպանող ավագանու անդամները եւ Դավիթ Մինասյանին համայնքապետ են ընտրել 11 ձայնով, որը 50 տոկոսից ավելի է:

Իրավիճակի հանգուցալուծումը դեռևս հայտնի չէ: Այս պահին համայնքապետարանը դեռևս փակ է: