կարևոր
2704 դիտում, 11 ամիս առաջ - 2021-12-10 12:10

Վարդենիսում խուզարկել են Ահարոն Խաչատրյանի բնակարանը

Վարդենիսում խուզարկել են Ահարոն Խաչատրյանի բնակարանը

Վարդենիսից մեզ հայտնում են, որ գիշերվանից ոստիկանությունը սկսել է ձերբակալել նաև «Ահարոն Խաչատրյան» դաշինքի թիմի անդամներին: 

Առավոտյան էլ 8։20 րոպեին մտել են դաշինքի ցուցակը գլխավորող Ահարոն Խաչատրյանի բնակարան, 2 ժամ ապօրինի խուզարկությունից հետո՝ ի վերջո փաստաբանին հաջողվել է ոստիկաններին պարտադրել դուրս գալ: Այժմ ոստիկանները տան բակում են: 

Հիշեցնենք, որ նախօրեին «Միասնական Վարդենիս» դաշինքի ցուցակը գլխավորող Արամ Հարությունյանին Սեւանի քննչական կոմիտեն հրավիրել է հարցաքննության ու ձերբակալել: Այս երկու դաշինքները դեկտեմբերի 5-ին կայացած ՏԻՄ ընտրությունների արդյունքների հիման վրա հայտարարել էին կոալիցիա կազմելու և համայնքային իշխանության ղեկավարումը ստանձնելու մասին: 

Իշխանության քաղաքական բռնաճնշումների դեմ հայտարարություն են տարածել «Միասնական Վարդենիս» և «Ահարոն Խաչատրյան» դաշինքները, ինչպես նաև՝ ՀՅԴ Հայաստանի Գերագույն մարմինը՝ դատապարտելով  նմանօրինակ բռնաճնշումները, որոնք խաթարում են և ստվեր են գցում արդար անցկացված ընտրությունների արդյունքների վրա։ 

«Տեղի ունեցողը երկրում առկա անօրինականության, քաղաքական հետապնդումների, թշնամանքի մթնոլորտի հերթական դրսևորումն է: Իշխող քաղաքական ուժն այս կերպ է հակադարձում ժողովրդի կամքի դրսևորմանը: Դատապարտելով նման գործելաոճը՝ հայտարարում ենք, որ բոլոր մեթոդներով հակազդելու ենք բռնության նման դրսևորումներին և ամեն գնով պաշտպանելու ենք ժողովրդի կամարտահայտության արդյունքները»,- ասվում է ՀՅԴ Հայաստանի ԳՄ հայտարարության մեջ: 

Երեկ, հաջակցություն ընդդիմադիր դաշինքի առաջնորդի, վարդենիսցիները մինչև ուշ գիշեր փակել էին ճանապարհը՝ պահանջելով դադարեցնել ապօրինի քաղաքական հետապնդումները։

Նշենք, որ այս համայնքում ևս, չնայած իշխող «Քաղաքացիական պայմանագիր» կուսակցությունը առավել ձայներն է հավաքել, սակայն մրցակից դաշինքների կոալիցիայի արդյունքում, իշխող կուսակցությունը չի ստանում համայնքի ղեկավարի պաշտոնը: 

«ԱՀԱՐՈՆ ԽԱՉԱՏՐՅԱՆ» ԿՈՒՍԱԿՑՈՒԹՅՈՒՆՆԵՐԻ ԴԱՇԻՆՔ 4 993
«ՄԻԱՍՆԱԿԱՆ ՎԱՐԴԵՆԻՍ» ԿՈՒՍԱԿՑՈՒԹՅՈՒՆՆԵՐԻ ԴԱՇԻՆՔ 2 206
«ՔԱՂԱՔԱՑԻԱԿԱՆ ՊԱՅՄԱՆԱԳԻՐ» ԿՈՒՍԱԿՑՈՒԹՅՈՒՆ 6 162