Արցախի Կառավարությունը ևս անտեսել է Հայ Առաքելական Եկեղեցու դիմումը

Անկեղծ ասած՝ հույս ունեի, որ գոնե Արցախում նման որոշում չի ընդունվի: Բայց սխալվեցի: Հիմա խորհրդարանն իր խոսքը պիտի ասի: Էլի հույս ունեմ: Այս մասին գրել է Աստվածամոր Սուրբ  Հովանի  մայր տաճարի հոգևոր հովիվ Տեր Ներսես քահանա Ասրյանը:

Նա հիշեցման կարգով մեջբերել է ՀԱԵ Հայաստանյան եպիսկոպոսների և թեմակալ առաջնորդների դիմումը ՀՀ ԱԺ-ին այս հարցով (թերևս արդեն կարող ենք սա համարել նաև դիմում ԱՀ ԱԺ-ին).

«Կարևորում ենք պետական տոնացույցում ազգային, հոգևոր ու պետական տոների և հիշատակի օրերի պատշաճ ներկայացվածությունը, քանզի մեր հոգևոր ու մշակութային արժեքները, ազգային դիմագիծն ու ձգտումները արտահայտվում են նաև տոների և հիշատակի օրերի խորհուրդներում:

Հատկանշական է, որ շատ երկրներում, որոնց թվում՝ Ավստրիան, Ֆրանսիան, Գերմանիան, Ռումինիան, Լեհաստանը, Լիտվան և հարևան Վրաստանը, պետական ոչ աշխատանքային օրերի գերակշռող մասը (60-80%)՝ եկեղեցական տոներ են։ Մինչդեռ քրիստոնեությունն իբրև պետական կրոն առաջինն ընդունած Հայաստանում՝ միայն 19% է եկեղեցական:

Այսու դիմում ենք Ազգային Ժողովի խմբակցություններին՝ Ամանորի ու Սուրբ Ծննդյան տոների ոչ աշխատանքային օրեր պահպանել նաև հունվարի 5-ը, որպես Սուրբ Ծննդյան Ճրագալույցի տոնական օր և հունվարի 7-ը, որպես մեռելոց հիշատակի օր, հատկապես, երբ արցախյան պատերազմի զոհերի ցավը դեռ մորմոքում է մեր ժողովրդի սրտում։Լիահույս ենք, որ ընդառաջ մեր ժողովրդի բարեպաշտ զգացումներին և աղոթքի ու մխիթարության հոգևոր կարիքներին՝ Ազգային Ժողովի կողմից նկատի կառնվի Մայր Աթոռ Սուրբ Էջմիածնի սույն առաջարկը»:

Հիշեցնենք, որ դեկտեմբերի 8-ին ԱՀ կառավարությունը հավանություն է տվել ««Արցախի Հանրապետության տոների և հիշատակի օրերի մասին» օրենքում փոփոխություններ կատարելու մասին» օրենքի նախագծին, որը ընդօրինակումն է ՀՀ Ազգային ժողովի կողմից ընդունված տոների և հիշատակի օրերի օրինագծին:

ԱՀ կառավարության որոշումն ուղարկվել է ԱՀ Ազգային ժողով՝ քննարկման համար: Ըստ ներկայացված նախագծի՝ 2022 թվականից Ամանորն ու Ծննդյան տոները՝ դեկտեմբերի 31-ից հունվարի 2-ը ներառյալ և հունվարի 6-ը նշվելու են որպես ոչ աշխատանքային օրեր: Աշխատանքային շաբաթն էլ սկսվելու է հունվարի 3-ին:

ՀՀ-ում օրենքի ընդունման նախօրեին Մայր Աթոռ Սուրբ Էջմիածնում հրավիրված Գերագույն հոգևոր խորհրդի ժողովը դիմել էր ՀՀ Ազգային Ժողովին՝ Ամանորի ու Սուրբ Ծննդյան տոների ոչ աշխատանքային օրեր պահպանել նաև հունվարի 5-ը՝ որպես Սուրբ Ծննդյան Ճրագալույցի տոնական օր և հունվարի 7-ը՝ որպես մեռելոց հիշատակի օր, հատկապես, երբ արցախյան պատերազմի զոհերի ցավը դեռ մորմոքում է մեր ժողովրդի սրտում: