կարևոր
1915 դիտում, 10 ամիս առաջ - 2021-12-07 10:23

Երդվում եմ հավատարիմ մնալ հորս դավանած սկզբունքներին և բացառիկ, անմնացորդ նվիրումին առ Հայրենիք. Ասպրամ Կրպեյանը պատգամավորական երդում տվեց

Երդվում եմ հավատարիմ մնալ հորս դավանած սկզբունքներին և բացառիկ, անմնացորդ նվիրումին առ Հայրենիք. Ասպրամ Կրպեյանը պատգամավորական երդում տվեց

Այսօր Ազգային Ժողովի նիստին «Հայաստան» խմբակցության պատգամավոր, Ազգային հերոս Թաթուլ Կրպեյանի դուստր Ասպրամ Կրպեյանը «ՀՀ ԱԺ կանոնակարգ» սահմանադրական օրենքի համաձայն՝ պատգամավորական երդմամբ պաշտոնապես ստանձնեց մանդատը: 

«Հարգելի ընդդիմադիր գործընկերներ, սիրելի հայրենակիցներ,

հանուն համազգային նպատակների իրագործման, հանուն ազատ, անկախ և միացյալ Հայաստանի` երդվում եմ հավատարիմ մնալ հորս` Հայաստանի ազգային հերոս Թաթուլ Կրպեյանի դավանած սկզբունքներին և բացառիկ, անմնացորդ նվիրումին առ Հայրենիք:

Կատարել 2020թ. նոյեմբերի 10-ի լուսադեմին «Եռաբլուր» զինվորական պանթեոնում տվածս երդումը` հանուն պատմական արդարության, համազգային միասնության և արժանապատվության վերականգնման:

Քանզի չկա Հայաստան` առանց Արցախ և չկա Արցախ` առանց Հայաստան:

Հավերժական Հայաստան լինելու է»:

Հիշեցնենք, որ նախորդ նիստին Ասպրամ Կրպեյանը պատգամավորական երդում չտվեց, քանի որ ընդդիմությունը բոյկոտել էր նիստը:

Ինչպես հայտնել էինք «Հայաստան» խմբակցության պատգամավոր Դավիթ Սեդրակյանը հրաժարվել էր պատգամավորական մանդատից, որին, ըստ ցուցակի, հաջորդում էր Առուշ Առուշանյանը: Նա ՏԻՄ ընտրություններում վերընտրվել էր Գորիսի խոշորացված համայնքի ղեկավար և հրաժարվել էր մանդատից: Հետեւաբար, պատգամավորական մանդատը ստանձնում է դաշինքի ցուցակում հաջորդ թեկնածու Թաթուլ Կրպեյանի դուստր, ՀՅԴ անդամ Ասպրամ Կրպեյանը: