կարևոր
973 դիտում, 1 ամիս առաջ - 2021-12-05 20:31

Նույն Հանրապետականները փոխեցին շորերը կամ մաշկերը, դարձան ՔՊ. Ազատ Հովակիմյանը՝ Ջերմուկի ընտրությունների մասին

Նույն Հանրապետականները փոխեցին շորերը կամ մաշկերը, դարձան ՔՊ. Ազատ Հովակիմյանը՝ Ջերմուկի ընտրությունների մասին

ՔՊ-ի ցուցակով նախկին ՀՀԿ-ականներ են մասնակցում ընտրություններին՝ Yerkir.am-ի հետ հարցազրույցում ասաց Ջերմուկ խոշորացված համայնքի ՏԻՄ ընտրություններում ՀՅԴ և «Համերաշխություն» ուժերը միավորող՝ «Մեր համայնքը» դաշինքի նախընտրական ցուցակը գլխավորող Ազատ Հովակիմյանը։

«Նույն Հանրապետականները փոխեցին շորերը կամ մաշկերը, դարձան ՔՊ։ 3-4 ամիս առաջ Հանրապետական էին, 4 ամսվա մեջ փոխվեցին բոլորը։ Նենց շուտ դե կարողանում են փոխվել էլի․ չեն փոխվել ժողովրդի համար, փոխվել են իրենց շահի համար։ Մարդկանց մի մասը դա զգում է, տեսնում է, մարդկանց մի մասն էլ ճարահատյալ ընտրում»,-ասաց Ազատ Հովակիմյանը։

Ազատ Հովակիմյանը բազմաթիվ ընտրախախտումներ է արձանագրել։

«Մանկապարտեզում տեսա հավաքվել են՝ մոտեցա ոստիկաններին, ասացի՝ ինչո՞ւ եք թողել, բա՝ 50 մետրը ապահովվում է։ Ասացի՝ դե բեր, չափի։ Չափեցին՝ եղավ 32 մետր, նոր դրանց հեռացրին, հեռու տարան։ Հավաքվում են ինչի՞ համար՝ դրանց ձեռագիրը լավ գիտեմ ես, հավաքվում են «կարուսելի» նպատակով, այլ խախտումների»,-ասաց Ազատ Հովակիմյանը։

Հավաքվում են ընտրատեղամասերի մոտ և ուղղորդում ընտրողներին․ սրանք, թեկնածուի համոզմամբ, «կարուսելի» տարրեր են։

Նա վստահեցրեց, որ վարչական ռեսուրսը միշտ էլ կիրառել է իշխող ուժը՝ քարոզարշավի ժամանակ է՛լ, հիմա է՛լ։

«Երևանից բերել են ավտոբուսներով․ կան մարդիկ, որոնց Ջերմուկում չենք տեսել՝ էսօր տեսնում ենք, ուսանողներն են, թե աշխատողներն են, դրանք սաղ եկել են, ընտրել են»,-վստահեցրեց Ազատ Հովակիմյանը։ Նա համոզված է, որ ֆինանսական լծակներ ևս օգտագործել են։

Աննա Բալյան