կարևոր
787 դիտում, 1 ամիս առաջ - 2021-12-02 13:09

Զինծառայողների իրավունքներին առնչվող հարցերը քննարկում ենք բաց ռեժիմով. Թագուհի Թովմասյանը մերժեց Անդրանիկ Քոչարյանի առաջարկը

Զինծառայողների իրավունքներին առնչվող հարցերը քննարկում ենք բաց ռեժիմով. Թագուհի Թովմասյանը մերժեց Անդրանիկ Քոչարյանի առաջարկը

ԱԺ Մարդու իրավունքների պաշտպանության և հանրային հարցերի մշտական հանձնաժողովի նախագահ Թագուհի Թովմասյանը հանդես է եկել «Զինվորական ծառայության և զինծառայողի կարգավիճակի մասին» օրենքում լրացում կատարելու մասին օրենքի նախագիծով:

Թագուհի Թովմասյանը հանձնաժողովում նախագծի քննարկման ժամանակ ասաց, որ նախնական տարբերակով առաջարկվում է օրենքի կետը խմբագրվի հետևյալ կերպ՝ պայմանագրային զինծառայողների ծառայության վայրում բնակարանային պայմանների բարելավման կարիք ունենալու դեպքում ապահովում են ծառայողական բնակարաններով պետական լիազոր մարմնի ղեկավարի հրամանով սահմանված կարգով:

«Ստացել ենք բազմաթիվ ահազանգեր, որ զինծառայողներն օգտվում են կառավարության կողմից իրենց վերապահած իրավունքից, արտոնությունից, ստանում են փոխհատուցում, բայց երբեմն ստանալու կարգում ստիպված են լինում օրենք խախտել, և այդ խախտման համար 81 քաղաքացի՝ որպես մեղադրյալ են ներգրավված տարբեր գործերով:

Առաջարկում ենք, որպեսզի այևս զինծառայողն անհրաժեշտություն չունենա վարձակալության պայմանագիր ներկայացնել, եթե ներկայացնում է կադաստրի կոմիտեից տեղեկանք սեփականություն չունենալու, հաշվառում չունենալու վերաբերյալ, համարենք բավարար: Այդ դեպքում զինծառայողը հնարավորություն կունենա ստանալ փոխհատուցում»,- ասաց Թագուհի Թովմասյանը: 

Քննարկմանը ներկա «Քաղաքացիական պայմանագիր» կուսակցության պատգամավոր, ԱԺ Պաշտպանության և անվտանգության հարցերի մշտական հանձնաժողովի նախագահ Անդրանիկ Քոչարյանն ասաց, որ սա աշխատանքային քննարկում է, ունի իր տրամաբանությունը և առաջարկեց քննարկումն անցկացնել փակ:

Թովմասյանը հակադարձեց՝ նշելով, որ քննարկում են զինծառայողների իրավունքներին առնչվող հարցեր, և իրենց հանձնաժողովն ունի ավանդույթ, այն է՝  աշխատել բաց ռեժիմով, չի կարծում այստեղ որևէ խնդիր կա, և որևէ մեկը կաշկանդված է: