կարևոր
310 դիտում, 2 շաբաթ առաջ - 2021-11-11 15:15

Ի՞նչ իրավական հիմքով են տեղակայվում ադրբեջանական մաքսակետերը. ԱԺ ընդդիմադիր պատգամավորները հրատապ հարցերի պատասխան են պահանջում

Ի՞նչ իրավական հիմքով են տեղակայվում ադրբեջանական մաքսակետերը. ԱԺ ընդդիմադիր պատգամավորները հրատապ հարցերի պատասխան են պահանջում

Այսօր Խորհրդարանում Մարդու իրավունքների պաշտպանության և հանրային հարցերի մշտական հանձնաժողովում աշխատանքային հրատապ քննարկում է հրավիրվել՝ Գորիս-Կապան ճանապարհի հատվածում ադրբեջանական մաքսակետեր տեղադրելու վերաբերյալ:

Նիստին մասնակցում էին բացառապես ընդդիմադիր «Հայաստան» և «Պատիվ ունեմ» խմբակցությունների պատգամավորները: Քննարկմանը հրավիրված են եղել նաև գործադիրի ներկայացուցիչները, այդ թվում՝ Փաշինյանը, ինչպես նաև՝ իշխող «Քաղաքացիական պայմանագիր» խմբակցության պատգամավորներ, սակայն նրանցից որևէ մեկը ներկա չէր քննարկմանը:

«Գորիս-Կապան ճանապարհին տեղադրվել են մաքսային կետեր, ստացվում է, որ ՀՀ տարածքի մասին այլևս պետք է անցյալով խոսենք, և չենք կարողանալու օգտվել այդ տարածքից: Սա վարչապետն ասում է սառը դատողությունների հորդորով և սառը գլխով որոշումներ կայացնելու անհրաժեշտությամբ, ինչն անընդունելի է»,-ասաց Թագուհի Թովմասյանը:

Հանձնաժողովի նախագահը ներկայացրեց այն հարցադրումները, որոնց Նիկոլ Փաշինյանը հստակ պետք է պատասխանտա՝

- Ինչի՞ հիման վրա եք հայտարարել, որ ադրբեջանական անցակետը չի գտնվում ՀՀ տարածքում։

- Արդյոք արդեն իրականացվել է դեմարկացիա և դելիմիտացիա։ Միայն դրա հիման վրա դուք կարող էիք նման հայտարարությամբ հանդես գալ։

- Ի՞նչ իրավական հիմքով է հայտարարվում, որ անցակետը ՀՀ տարածքից դուրս է․ ո՞ր քարտեզի հիման վրա։

- Երբ պետական սահմանի փոփոխություն է իրականացվում, այն իրականացվում է «Պետական սահմանի մասին» ՀՀ օրենքի փոփոխությամբ։ Մենք օրենքի որևէ փոփոխություն չենք իրականացրել, հետևաբար սա իրավական տեսանկյունից խնդրահարույց է։

- Ինչպե՞ս է իրականացվելու ադրբեջանական սահմանային ու մաքսային վերահսկողության պայմաններում մարդկանց ու ապրանքների ազատ և անվտանգ տեղաշարժը։

Թագուհի Թովմասյանը նշեց, որ ակնկալում են այս հարցերի պարզաբանումներն ստանալ կառավարությունից, բայց մինչ այս պահը արձագանք չկա.

«Հույս ունենք, որ Կառավարության ներկայացուցիչը կներկայանա խորհրդարան: Իսկ եթե չներկայանա, մենք մեր ասելիքը հրապարակավ պետք է փոխանցենք՝ ակնկալելով, որ առաջիկայում ինչ-որ ֆորմատ կձևավորվի, և հնարավորություն կունենանք մինչև լիագումար նիստերի սկսվելը պարզաբանումներ ստանալ»,-ասաց նա: