Իշխանությունները պարտադրո՞ւմ են Իշխան Զաքարյանին դուրս գալ ընդդիմադիր խմբակցությունից. նա կխոսի երկուշաբթի

«Պատիվ ունեմ» խմբակցության պատգամավոր Իշխան Զաքարյանը չի ցանկանում մեկնաբանել իր՝ խմբակցությունից դուրս գալու մասին տեղեկությունները. «Ոչ հերքում եմ, ոչ՝ հաստատում»,-լրագրողներին ասաց պատգամավորը:

Իշխան Զաքարյանը նաև հայտնել է, որ երկուշաբթի կհրավիրի բոլոր լրագրողներին ու կխոսի այդ թեմայով.:

Այսօր «Հրապարակ» թերթը գրել էր, որ Տեւական ժամանակ է՝ խոսվում է «Պատիվ ունեմ» խմբակցության պատգամավոր Իշխան Զաքարյանի՝ խմբակցությունից դուրս գալու մասին։ Զաքարյանն օրերս խմբակցության ղեկավարությանը հայտնել է, որ որոշումն արդեն կայացրել է եւ, ըստ ամենայնի, առաջիկայում կհրապարակի։ Պրոցեսը, որը սկսվել էր ամիսներ առաջ, գուցե` նոր ԱԺ-ի կազմավորման առաջին իսկ պահից, պարզապես սառեցվել էր Արթուր Վանեցյանի շնորհիվ։

Թերոը նշում էր, որ Վանեցյանը Զաքարյանին հորդորել էր խմբակցությունը լքելու դեպքում մանդատից հրաժարվել, սակայն Զաքարյանի ՔՊ-ական ընկերները` Խաչատուր Սուքիասյանի ղեկավարությամբ, ավելի համառ են գտնվել:

«Փաստինֆո»-ի տեղեկություններով՝ Վերահսկիչ պալատի նախկին նախագահ, ՀՀ ԱԺ պատգամավոր Իշխան Զաքարյանի վերաբերյալ ԱԱԾ-ում քրեական գործ է հարուցվել՝ պաշտոնեական դիրքի չարաշահման հատկանիշներով։ Խոսքը գնում է հողերի օտարման գործընթացի մասին. ըստ նախաքննական մարմնի՝ կազմակերպված աճուրդները կրել են ձեւական բնույթ՝ հօգուտ Իշխան Զաքարյանի։

Իշխանությունները հատուկ բանագնացի միջոցով հասկացրել են, որ կամ պետք է դուրս գա ընդդիմադիր՝ «Պատիվ ունեմ» խմբակցությունից, որի ցուցակով ընտրվել էր պատգամավոր, կամ էլ նրան կնստեցնեն։

Ընդ որում՝ հարցը դրվել է այնպես, որ նա չպետք է մանդատը վայր դնի, ու այս ամիսներին պատգամավորական գործունեությամբ աչքի չընկած Իշխան Զաքարյանը պետք է մնա որպես լրացուցիչ «կոճակ սեղմող»՝ իշխանությունների համար քաղաքական նշանակություն ունեցող հարցերի քվեարկության համար։