Փաշինյանի պնդումը, որ զորքերի հետքաշման հրամանն արձակել է, որպեսզի չկորցնենք ռազմավարական նշանակության ճանապարհները, անհեթեթ է․ Աննա Գրիգորյան

«Ասում է՝ հրաման եմ տվել, որ զորքերը հետ քաշվեն, որպեսզի ստրատեգիական նշանակության ճանապարհները չկորցնենք։ Որքանով ինձ է հայտնի, այս պահին Գորիս-Կապան ճանապարհի առնվազն մի հատվածը գտնվում է Ադրբեջանի տնօրինության ներքո»,- «Կորսված հաղթանակ․ դավաճանությու՞ն, թե՞ անգրագիտություն» խորագրով համաժողովին ասաց ԱԺ «Հայաստան» խմբակցության պատգամավոր Աննա Գրիգորյանը՝ արձագանքելով Փաշինյանի այն հայտարարությանը, որ Սյունիքի դիրքերից, բարձունքներից հայկական զորքերի հետքաշման հրամանը ինքն անձամբ է արձակել։

Պատգամավորը ընդգծեց, որ Գորիս-Կապան ռազմավարական նշանակության ճանապարհի հատվածը միակ կորուստը չէ, որն այս ընթացքում՝ Փաշինյանի արձակած հրամանից հետո, կրել է Հայաստանը։

«Կապան-Ճակատեն ճանապարհը, որը ևս ռազմավարական նշանակության ճանապարհ է՝ հաշվի առնելով, որ դեպի Մեղրի տանող մեր այլընտրանքային ճանապարհն է և որի վրա մի քանի գյուղեր կան, ևս անցել է ադրբեջանական վերահսկողության ներքո։ Հետևաբար, այն պնդումը, որ նա դա արել է, որպեսզի չկորցնենք ռազմավարական նշանակության ճանապարհները, մեղմ ասած, անհեթեթ է և անհնար է արդարացնել»,- շեշտեց Աննա Գրիգորյանը։