կարևոր
973 դիտում, 1 ամիս առաջ - 2021-10-25 16:29

Վաղ է մեկնաբանել դեսպաններին արտաքսելու վերաբերյալ Թուրքիայի որոշումը․ՆԱՏՕ-ի գլխավոր քարտուղար

Վաղ է մեկնաբանել դեսպաններին արտաքսելու վերաբերյալ Թուրքիայի որոշումը․ՆԱՏՕ-ի գլխավոր քարտուղար

ՆԱՏՕ-ի գլխավոր քարտուղար Յենս Ստոլտենբերգը հայտարարել է, որ 10 երկրի դեսպաններին Թուրքիայի կողմից անցանկալի անձ հայտարարելու որոշման շրջանակում դեռ ոչ մի գործողություն չի իրականացվել, ուստի դեռ վաղ է մեկնաբանել Թուրքիայի որոշումն ու հարկավոր է սպասել Անկարայի և նշված երկրների միջև բանակցությունների արդյունքներին։ Այս հայտարարությունը Ստոլտենբերգն արել է Հելսինկիում՝ Ֆինլանդիայի նախագահ Սաուլի Նիինիստյոյի հետ ճեպազրույցի ժամանակ։

«Մենք դեռ չգիտենք, թե Թուրքիայի և ներգրավված երկրների միջև շփումներն ինչ արդյունքի են հանգեցրել, ուստի վաղ է խոսել այդ մասին», - ասել է ՆԱՏՕ-ի գլխավոր քարտուղարը։

Նրա խոսքով՝ այս առնչությամբ դեռ ոչ մի միջոց չի ձեռնարկվել, հարկավոր է սպասել երկրների միջև բանակցությունների արդյունքներին։

Հիշեցնենք, որ հոկտեմբերի 18-ին Անկարայում Գերմանիայի, ԱՄՆ-ի, Դանիայի, Ֆինլանդիայի, Ֆրանսիայի, Հոլանդիայի, Շվեդիայի, Կանադայի, Նորվեգիայի և Նոր Զելանդիայի դեսպանները համատեղ հայտարարությամբ էին հանդես եկել և կոչ արել ազատել բանտում գտնվող իրավապաշտպան Օսման Քավալային։

Դեսպանները հաջորդ օրը կանչվել էին Թուրքիայի ԱԳՆ և զգուշացվել, իսկ հոկտեմբերի 23-ին, Էրդողանը հայտնել էր, որ Թուրքիայի արտգործնախարարին հանձնարարել է «անցանկալի անձինք» /personae non gratae/ հայտարարել այդ երկրների դեսպաններին։