կարևոր
790 դիտում, 1 շաբաթ առաջ - 2021-10-09 21:48

Այսօր Սուրբ Ղազար կղզում տեղի ունեցավ «Ավրորա» մրցանակի շնորհման արարողությունը․ ՖՈՏՈՇԱՐՔ

Այսօր Սուրբ Ղազար կղզում տեղի ունեցավ «Ավրորա» մրցանակի շնորհման արարողությունը․ ՖՈՏՈՇԱՐՔ

Այսօր Սուրբ Ղազար կղզում տեղի ունեցավ «Ավրորա» մրցանակի շնորհման արարողությունը, որն անցկացվեց «Վեր հառնելով միասին» խորագրի ներքո: Այն վարեցին Դալյա Աթալլահը եւ Դեյվիդ Իգնաթիուսը։ Մինչ միջոցառման մեկնարկը Սուրբ Ղազար կղզում՝ Մխիթարյան միաբանության եկեղեցում, տեղի ունեցավ համերաշխության աղոթք՝ հոգեւոր եւ պետական առաջնորդների, միջազգային մարդասիրական համայնքի ներկայացուցիչների մասնակցությամբ:

Միջոցառման մեկնարկին տեղի ունեցավ Վարդան Գրեգորյանի հիշատակին նվիրված միջոցառում: «Ի հիշատակ «Ավրորայի» համահիմնադիր Վարդան Գրեգորյանի» միջոցառումը նվիրված էր նրա անցած բացառիկ ուղուն եւ հիշարժան առաքելությանը, որը տեւեց մի քանի տասնամյակ եւ հատեց գիտական եւ բարեգործական սահմաններն աշխարհով մեկ:

Որպես «Ավրորայի» համահիմնադիր եւ «Ավրորա» մրցանակի Ընտրող հանձնաժողովի անդամ՝ Վարդան Գրեգորյանն անխոնջ աշխատել է՝ օգնելու այդ տեսլականը կյանքի կոչելուն եւ երկրորդ հնարավորություն տալու նրանց, ովքեր ամենից ավելի ունեն դրա կարիքը: Նա կյանքից հեռացավ 2021 թվականին, բայց նրա ժառանգությունն ապրում է եւ շարունակելու է ապրել հավերժության մեջ:

Միջոցառմանը կատարումներով հանդես եկան ծիրանափողի վարպետներ Արամ Իփեքջյանը եւ Ջիվան Գասպարյան կրտսերը, ինչպես նաեւ «Հովեր» պետական կամերային երգչախումբը՝ Սոնա Հովհաննիսյանի ղեկավարությամբ:

«Ավրորա» համաշխարհային մարդասիրական ամենամյա վեցերորդ մրցանակն շնորհվեց մարդու իրավունքների պաշտպան, «Կանանց համերաշխություն հանուն ներառական խաղաղության եւ զարգացման» կազմակերպության եւ Կոնգոյացի կանանց հիմնադրամի (FFC) համահիմնադիր Ջուլիեն Լուսենգեին, որը տարիներ շարունակ աջակցել է պատերազմի ժամանակ սեռական բռնության ենթարկվածներին:

Ջուլիեն Լուսենգեն կստանա 1.000.000 ԱՄՆ դոլար պարգեւ եւ նվիրատվության շղթան շարունակելու հնարավորություն՝ աջակցելով կազմակերպությունների, որոնք օգնում են կարիքի մեջ գտնվող մարդկանց:

Այս տարի, հաշվի առնելով 2020 թ. պատերազմից տուժած արցախցիների խիստ կարիքները, «Ավրորան» կառաջարկի նրան մրցանակի 25%-ն ուղղել Արցախի մարդասիրական հրատապ խնդիրների հաղթահարմանը: «Ավրորայի» համահիմնադիրներն ստանձնել են հանձնառություն՝ կրկնապատկելու այդ նվիրատվությունը՝ գումարի չափը հասցնելով 500.000 ԱՄՆ դոլարի: