կարևոր
523 դիտում, 1 շաբաթ առաջ - 2021-10-05 15:12

Հանձնաժողովի նախագահի անգործության կամ միտումնավորության պատճառով երեկ արտահերթ նիստ տեղի չունեցավ. Գեղամ Մանուկյան

Հանձնաժողովի նախագահի անգործության կամ միտումնավորության պատճառով երեկ արտահերթ նիստ տեղի չունեցավ. Գեղամ Մանուկյան

Որ ասում եք Սյունիքում էիք, հասկանալի չէ՝ Սյունիք գնացել էիք տեղական ինքնակառավարման մարմինների ընտրությունների քարոզարշավին մասնակցելո՞ւ, լուսանկարվելո՞ւ, թե՞ իրավիճակը տեղում պարզելու համար: ՀՀ ԱԺ պաշտպանության և անվտանգության հարցերի մշտական հանձնաժողովի արտահերթ նիստի իր ելույթի ժամանակ ասաց «Հայաստան» խմբակցության պատգամավոր Գեղամ Մանուկյանը:

«Ինչ վերաբերում է հարցապնդումներին, այո՛, բազմաթիվ հարցապնդումներ ես պաշտպանության նախարարին ուղղել եմ Սյունիքի հետ կապված: Հարցապնդումը վերաբերում է այն բոլոր գործողություններին, որ կապիտուլյացիոն հայտարարությունից հետո դեկտեմբերի ընթացքում տեղի է ունեցել՝ ինչպե՞ս են հայկական զինված ուժերի ստորաբաժանումները, կամավորական խմբերը հետ քաշվել 10 կմ-ից ավելի, ինչի՞ հիման վրա է եղել, եղե՞լ է արդյոք որևէ փաստաթուղթ, հրամանը ի՞նչ փաստաթղթի հիման վրա է եղել, եղե՞լ է արդյոք այլ երկրների հետ կնքված որևէ փաստաթուղթ, համաձայնագիր, հռչակագիր»,-ասաց Գեղամ Մանուկյանը:

Պատգամավորը նշեց, որ այդ բոլոր հարցերը ուղղվել են պաշտպանության նախարարին և օրենքով սահմանված ժամկետում պատասխանները ստանալուց հետո շատ ավելի առարկայական կբարձրաձայնեն այդ ամենի մասին: 

«Մեր օրենքի սահմաններում, ճիշտ ժամկետներում ուղարկված արտահերթ նիստ հրավիրելու առաջարկին հանձնաժողովի նախագահի կողմից պատասխանը եկել է այն ժամանակ արդեն, երբ որ նիստը պետք է կայացած լիներ: Փաստը այն է, որ Ազգային Ժողովի կանոնակարգին համապատասխան մենք իրավունք ունեինք պահանջելու արտահերթ նիստ, որի ժամանակ արդեն քննարկումը կլիներ՝ թե ի՞նչ ձևաչափով է լինելու, արդյոք որոշման նախագիծ պետք է լինի՞, թե՝ ոչ, բայց հանձնաժողովի նախագահի անգործության կամ միտումնավորության պատճառով երեկ արտահերթ նիստ տեղի չունեցավ»,-ասաց Մանուկյանը:

Հիշեցնենք, որ այսօր՝ հոկտեմբերի 5-ին, ՀՀ ԱԺ պաշտպանության և անվտանգության հարցերի մշտական հանձնաժողովի արտահերթ նիստ էր հրավիրվել։

Հավելենք, որ ընդդիմադիր պատգամավորները բոյկոտեցին ԱԺ պաշտպանության և անվտանգության հարցերի մշտական հանձնաժողովի արտահերթ նիստը: