կարևոր
397 դիտում, 3 շաբաթ առաջ - 2021-10-05 14:17

Դատարանը հետաձգեց Արմեն Գևորգյանի պատգամավորական անձեռնմխելիությունը ճանաչելու միջնորդության լուծումը

Դատարանը հետաձգեց Արմեն Գևորգյանի պատգամավորական անձեռնմխելիությունը ճանաչելու միջնորդության լուծումը

Երևանի ընդհանուր իրավասությունների դատարանը՝ Աննա Դանիբեկյանի նախագահությամբ, շարունակում է քննել Սիլվա Համբարձումյանի՝ ենթադրյալ կաշառք տալու գործը:

Արմեն Գևորգյանի փաստաբան Լուսինե Սահակյանը միջնորդություն է ներկայացրել դատարանին՝ խնդրելով ճանաչել Արմեն Գևորգյանի, որպես ԵԽԽՎ անդամի, անձեռնմխելությունը և ապահովել նրա մշտական, անարգել ազատ տեղաշարժման հնարավորությունը։

Փաստաբանը հիշեցրել է, որ անձը օգտվում է բացարձակ անձեռնմխելիությունից՝ կապված իր խորհրդարանական գործունեության հետ։

«Դուք պարտավոր եք ճանաչել նրա անձեռնմխելիությունը, ուստի, ես խնդրում եմ ճանաչեք այն ու ապահովեք ազատ տեղաշարժի իրավունքը», - ասաց Սահակյանը։

Պաշտպանական կողմին լսելուց հետո դատարանը գտավ, որ պետք է հետաձգի միջնորդության լուծումը մինչև դրա համար էական նշանակության հանգամանքների պարզումը։

Անդրադառնալով Գևորգյանի՝ ՀՀ-ից մեկնելու համար թույլտվություն ստանալու հարցին, դատավորը նշեց, որ ամեն անգամ դատարանը կքննարկի այն։

Արմեն Գևորգյանը հայտարարեց, որ դիմել է ԵԽԽՎ համապատասխան մարմիններին՝ ներկայացնելով ստեղծված իրավիճակը։

«Որովհետև սա արդեն ներպետական խնդիր չէ, սա արդեն դառնում է համապատասխան խորհրդաժողովի ու այդ միջազգային կառույցի քննարկման առարկան», - ասաց նա։