կարևոր
739 դիտում, 3 շաբաթ առաջ - 2021-09-30 18:52

Մահացել է հայտնի լրագրող, Հայաստանի ժուռնալիստների միության անդամ Կորյուն Խումարյանը

Մահացել է հայտնի լրագրող, Հայաստանի ժուռնալիստների միության անդամ Կորյուն Խումարյանը

80 տարեկան հասակում մահացել է «Իմպուլս-մայակ» ռադիոկայանի տնօրեն, հայտնի լրագրող, Հայաստանի ժուռնալիստների միության անդամ Կորյուն Խումարյանը:

Նա  ծնվել է 1941թ. նոյեմբերի 1-ին, Վրաստանի Բոգդանովկայի շրջանի Սաթխա գյուղում: Ավարտել է  Երևանի Վ. Բրյուսովի անվան ռուսաց և օտար լեզուների պետական մանկավարժական ինստիտուտի բանասիրության ֆակուլտետը: 

Լրագրողական գործունեությունը սկսել է 25 տարեկանից` «Հայաստանի արդյունաբերությունը» ամսագրում։ 1999թ.-ից «Իմպուլս-մայակ» ռադիոկայանի տնօրենն էր: Մինչ այդ՝ եղել է Ռուսաստանի հանրային հեռուստատեսության, ԽՍՀՄ հեռուստառադիոպետկոմի սեփական թղթակիցը Հայաստանում:  

Աշխատակցել է նաև «Կոմերսանտ», «Ռեսպուբլիկա Արմենիա», «Գոլոս Արմենիի», «Ուրարտու», «Հայացք Երևանից» հայաստանյան ու ռուսաստանյան պարբերականներին։ Վարել է հեղինակային հաղորդումներ ԽՍՀՄ կենտրոնական և Հայաստանի հեռուստատեսություններում։

1981թ-ին  արժանացել է  ԽՍՀՄ հեռուստատեսային ֆիլմերի համամիութենական փառատոնի «Գրան պրիի», 1982թ.-ին՝ «Անձնվեր աշխատանքի համար» շքանշանի։

Հատկապես մեծ է նրա դերը հայաստանյան լրագրության զարգացման գործում։ Երկար տարիներ ռադիոժուռնալիստիկա է դասավանդել ԵՊՀ ժուռնալիստիկայի ֆակուլտետում: 

Ինչպես հաղորդում է նրա որդին, Հանրային ռադիոյի տնօրեն Գարեգին Խումարյանը՝ Կորյուն Խումարյանի հոգեհանգիստը տեղի կունենա վաղը՝ հոկտեմբերի 1-ին, 18:00-20:00, Նոր Նորքի Սուրբ Սարգիս եկեղեցում: Հուղարկավորությունը՝ հոկտեմբերի 2-ին Շահումյան-2 գերեզմանատանը:  

«Երկիր մեդիա» հեռուստաընկերության ողջ անձնակազմն իր ցավակցությունն է հայտնում Խումարյանների ընտանիքին՝ Գարեգին և Դավիթ Խումարյաններին, մեր գործընկերուհի Գայանե Ավետիսյանին: