կարևոր
730 դիտում, 3 շաբաթ առաջ - 2021-09-28 17:22

Համանախագահները կայցելեն տարածաշրջան. հանդիպումներ են նախատեսված նաեւ Ստեփանակերտում

Համանախագահները կայցելեն տարածաշրջան. հանդիպումներ են նախատեսված նաեւ Ստեփանակերտում

ԵԱՀԿ Մինսկի խմբի համանախագահները, օրերս Նյու Յորքում կայացած հանդիպման արդյունքում, Բաքվի եւ Երեւանի հետ պայմանավորվել են վերսկսել աշխատանքային այցերը տարածաշրջան: Այս մասին հայտնել է Ռուսաստանի արտգործնախարար Սերգեյ Լավրովը:

«Որքան ես եմ հասկանում, նրանք համաձայնեցրել են տարածաշրջան իրենց այցերի վերսկսումը՝ տեղում Հայաստանի եւ Ադրբեջանի ներկայացուցիչների հետ զրուցելու համար: Նաեւ Ստեփանակերտում են հանդիպումներ նախատեսված»,- Վիետնամի արտգործնախարարի հետ համատեղ ասուլիսի ժամանակ ասել է Լավրովը:

Նրա խոսքով՝ 2020 թվականի նոյեմբերին ձեռք բերված պայմանավորվածությունների գլխավոր արդյունքը տարածաշրջանում կայունության հաստատումն է:

«Այն պահպանվում է եւ ռուսաստանյան խաղաղապահ զորախումբը նպաստում է, որպեսզի չլինեն բռնի գործողություններ: Փոքր միջադեպերը, որոնք սկզբնական փուլում էին տեղի ունենում, արագ լուծվեցին: Եւս մեկ անգամ ընդգծեմ, որ իրավիճակն այնտեղ կայուն է, թեպետ, խնդիրները քիչ չեն»,- ասել է Լավրովը՝ կարեւոր համարելով, որ հայերի ու ադրբեջանցիների միջեւ վստահության մթնոլորտ հաստատվի, լուծվի փախստականների վերադարձի հարցը եւ կենցաղային այլ խնդիրներ:

Ռուսաստանի արտգործնախարարի խոսքով՝ այս փուլում հավակնոտ այլ ծրագրեր կազմել պետք չէ: